• Era sindica, Maria Vergés, s’a dirigit autant ara DGT coma ath Servici Catalan de Transit entà sollicitar que se limite, un an mès, eth pas de veïculs articuladi pendent era sason d’iuèrn entà garantir era seguretat des usatgèrs e usatgères d’aguesta carretèra, e que s’implementen es contròls pertinents entà velhar peth compliment d’aguestes limitacions

• Der an 2019 ençà, eth govèrn deth Conselh Generau d’Aran a artenhut implementar aguesta limitacion pendent es dimenjades dera sason d’iuèrn, qu’ei quan mès afloéncia a aguesta via, entre era localitat de Benabarre e era termièra francesa dera Val d’Aran

Era sindica d’Aran, Maria Vergés, un an mès, a sollicitat per carta ara Dirección General de Tráfico (DGT) e ath Servici Territoriau de Transit de Lleida era limitacion deth pas de camions ena N-230 pendent era sason d’iuèrn entà garantir era seguretat des usatgèrs e usatgères dera via.

“Era carretèra N-230 s’a caracterizat pendent es darrèri ans per èster ua via damb nauta sinistralitat pr’amor qu’era nauta preséncia de veïculs articuladi e es condicions orografiques e climatologiques la hèn especiaument perilhosa”, afirmaue ena missiva era sindica d’Aran, en tot híger que: “en an 2019, dempús d’ua demana deth govèrn deth Conselh Generau d’Aran, s’aprovèc era restriccion deth pas de veïculs articuladi de mercaderies pendent era tempsada d’esquí, qu’ei quan aguesta via compde damb ua major afloéncia. Ua mesura qu’a estat molt ben acuelhuda en territòri e que sollicitam que se pogue tornar a implementar enguan”.

En aguest sens, ena carta s’a hèt especiau indicéncia en besonh d’amiar a tèrme es contròls de besonh entà assegurar-se eth compliment d’aguestes restriccions.

En ans anteriors, s’a artenhut limitar eth pas de camions de diuendres a dimenge entre es localitats de Benabarre (Òsca) e era termièra francesa dera Val d’Aran.