• Era sindica d’Aran, acompanhada des conselhèrs de Torisme e Promocion Economica, s’a amassat aguest maitin damb eth conselhèr d’Empresa e Trabalh dera Generalitat entà trasladar-li eth besonh d’actualizar aguest airau competenciau que ven definit ena Lei d’Aran e que non s’a revisat de 1997 ençà.

• Atau madeish, eth govèrn deth Conselh Generau d’Aran a demanat ath conselhèr d’Empresa e Trabalh qu’era Generalitat de Catalunya actue entà modificar era actuau normativa d’abitatges d’ús toristic deuant dera grèu problematica d’accès ar abitatge que patís era Val d’Aran

• Era trobada s’a mantengut en marc dera Hèira Internacionau de Torisme de Madrid (FITUR) a on era Val d’Aran torne a èster present, un an mès, en tot promocionar eth nòste territòri coma destinacion qu’apòste pera sostenibilitat, eth suenh des nòstes montanhes e dera nòsta singularitat e cultura

Era sindica d’Aran, Maria Vergés, es conselhèrs de Torisme e Promocion Economica, Juan Antonio Serrano e Josep Canut, an mantengut ua trobada damb eth conselhèr d’Empresa e Trabalh dera Generalitat, Roger Torrent,  damb qui an tractat diuèrsi ahèrs d’importància entara Val d’Aran, d’entre es que ne destaquen era revision e actualizacion deth traspàs en matèria de torisme e eth besonh qu’era Generalitat de Catalunya modifique era actuau normativa referenta as abitatges d’ús toristic entà facilitar er accès assequible ara viuenda autant tara joenessa coma entà trabalhadors en Aran qu’actuauments ei limitada per aguest tipe d’abitatges.

“Auem trasladat ath conselhèr eth besonh d’actualizar era competéncia en matèria de torisme e promocion economica deth Conselh Generau d’Aran, que derive d’un convèni que non s’a actualizat ne revisat der an 1997 ençà, e que limite fòrça es recorsi que i podem dedicar e tanben er àmbit competenciau a on podem actuar” afirmaue era sindica d’Aran, en tot híger que: “aguest ei un mès des punts dera Lei d’Aran que demoren sense desvolopar e qu’ei important qu’acabe de consolidar-se pr’amor dera transcendéncia, autant economica coma sociau, qu’er airau deth torisme a entà Aran”.

Atau madeish, era sindica d’Aran destacaue que: “era volontat deth govèrn deth Conselh Generau d’Aran ei auançar enquia un torisme sostenible e respectuós damb eth nòste territòri, ath temps qu’ajude a desvolopar estratègies innovadores que permeten er equilibri ambientau, territoriau, economic e sociau.

Tà Juan Antonio Serrano, conselhèr de Torisme e Promocion Economica, “era linha encetada deth govèrn deth Conselh Generau ençà damb eth trabalh qu’amiam a tèrme damb eth Plan de Sostenibilitat Toristica, damb accions coma eth contròl d’accèssi, era desestacionalizacion e diversificacion dera aufèrta toristica e era implementacion des naues tecnologies, atau coma d’autes que s’anaran presentant en brèu, mos permeteran auançar enquia ua destinacion intelligenta e sostenibla”.

Era Val d’Aran ei presenta, a trauès de Foment Torisme Val d’Aran, en aguesta edicion de FITUR, coma cada an, a trauès d’un airau pròpri en estand de Turisme de Catalunya.