• Eth conselhèr d’Espòrts dera Generalitat de Catalunya s’amassaue ager damb era Sindica d’Aran e eth vicesindic tresau e conselhèr d’Espòrts, ena sedença deth Conselh Generau d’Aran entà tractar sus es traspassi competenciaus en matèria d’espòrts atau coma d’autes qüestions coma eth plan d’equipaments esportius d’Aran, ena qu’a estat era sua prumèra trobada oficiau.

Pendent eth dia d’ager s’amièc a tèrme era visita institucionau entà Aran deth conselhèr d’Espòrts dera Generalitat de Catalunya, Berni Álvarez, acompanhat peth secretari generau Abel García, que sigueren recebudi pera sindica d’Aran, Maria Vergés e eth vicesindic tresau e conselhèr d’Espòrts, Javier Cavero.

Era trobada servic entà trasladar ath conselhèr Álvarez eth besonh d’iniciar es trabalhs entath traspàs des competéncies en matèria d’espòrts ath Conselh Generau d’Aran que permete eth desvolopament des politiques e projèctes qu’en matèria esportiva e socioeconomica a de besonh eth nòste territòri, e qu’en mès de trenta ans non s’a desvolopat encara.

Eth conselhèr d’Espòrts, Javier Cavero, asseguraue que “començam a establir es bases entà qu’es projèctes e es infraestructures esportives agen eth potenciau entà  garantir, non sonque eth supòrt des joeni talents esportius, se non de tota era comunautat aranesa en generau”.

Era visita a servit tanben entà trasladar ath conselhèr Álvarez eth projècte qu’impulse eth Conselh Generau d’Aran entà qu’eth nòste territòri pogue compdar damb un centre especializat en nhèu e montanha, qu’ath delà de potenciar ua grana basa d’esportistes sigue tanben un referent en matèria d’innovacion e medicina esportiva.

Era sindica d’Aran, Maria Vergés, manifestaue que “iniciar definitivaments es trabalhs entà un traspàs competenciau tant important entà Aran coma ei eth der espòrt mos a de perméter dessenhar es politiques esportives qu’ajuden a fomentar e planificar er espòrt ena Val d’Aran atau coma era gestion des equipaments esportius actuaus e futurs e auançar en desvolopament d’airaus destacadi coma eth dera tecnificacion”.

Pendent era trobada, eth conselhèr Álvarez visitaue era Escòla de Tecnics Esportius Val d’Aran (ETEVA) tà conéisher era formacion territoriau en matèria d’espòrts e participaue damb era sindica d’Aran e eth vicesindic tresau, dera trobada damb eth president dera  RFEDI, May Peus  e eth president dera  FCEH, David Samper, damb es qu’an tractat entre d’auti ahèrs sus eth projècte deth centre especializat de nhèu e montanha.

Vielha, 06 de març 2025