• Era sindica d’Aran, acompanhada peth conselhèr d’Economia, Torisme e Promocion Economica, a recebut aguesta tarde en Conselh Generau d’Aran ara conselhèra d’Economia e Isenda dera Generalitat, ara que li a sollicitat que s’inicien es trabalhs entà dessenhar eth nau modèl de finançament qu’a de regir es recorsi dera maxima institucion aranesa es pròplèu quate ans, dempús qu’a finaus de 2023 finalize er actuau acòrd de finançament

• Era sindica tanben a trasladat ara conselhèra eth besonh de qu’era Generalitat revertisque era situacion d’infrainversion que patís Aran enes darrèri ans entà poder atau hèr front as actuaus besonhs deth territòri, coma pòden èster era remodelacion der Espitau Val d’Aran, eth finançament de politiques d’abitatge o eth bastiment deth centre culturau dera Val d’Aran

Aguesta tarde, era sindica d’Aran, Maria Vergés, acompanhada peth conselhèr d’Economia, Torisme e Promocion Economica, Juan Antonio Serrano, s’a amassat damb era conselhèra d’Economia e Isenda dera Generalitat de Catalunya, Natàlia Mas, damb qui an tractat diuèrsi ahèrs relacionadi damb eth finançament dera maxima institucion aranesa e es inversions dera Generalitat en Aran.

“È trasladat ara conselhèra Mas eth besonh urgent de començar a trabalhar en nau acòrd de finançament deth Conselh Generau d’Aran, pr’amor qu’er actuau convèni finalize enguan e ei indispensable dessenhar eth nau convèni, qu’a de contemplar era capacitat d’autogovèrn dera maxima institucion aranesa” afirmaue era sindica d’Aran.

Eth modèl de finançament ei er acòrd que determine es recorsi qu’a de recéber eth Conselh Generau d’Aran que, per un costat an d’equiparar-se proporcionaument as modificacions que s’amien a tèrme en pressupòst dera Generalitat e, per un aute, ei de besonh qu’aguest nau acòrd impulse aquères partides qu’an de perméter desvolopar es politiques pròpies, ei a díder, era capacitat de decision e gestion deth  territòri ençà.

“Compdar damb un acòrd de finançament que recuelhe era capacitat d’autogovèrn deth Conselh Generau d’Aran ei essenciau entà arténher eth desvolopament efectiu d’aguest autogovèrn, pr’amor qu’ei de besonh compdar damb es recorsi entà poder aplicar ues politiques que meten as persones en centre, entà poder gestionar dera proximitat ençà”, afirmaue era sindica d’Aran, en tot híger que “er actuau acòrd, maugrat es discrepàncies, a estat un acòrd positiu entà Aran qu’a permetut equiparar era evolucion des pressupòsti d’andues institucions”.

Atau madeish, a trasladat ara conselhèra eth besonh qu’a eth Conselh Generau d’Aran de qu’era Generalitat revertisque “era actuau situacion d’infrainversion qu’era Val d’Aran acumule enes darrèri dotze ans que, atau e coma reflectissen es donades deth departament d’Economia, se trape en -84%, entà poder atau hèr front as actuaus besonhs deth territòri, coma pòden èster era remodelacion der Espitau Val d’Aran, eth finançament de politiques d’abitatge o eth bastiment deth centre culturau dera Val d’Aran”.

En finalizar era amassada, era conselhèra d’Economia e Isenda a presentat es presuspòsti dera Generalitat entà 2023 en un acte dubèrt as alcaldes e alcaldesses deth territòri, atau coma es principaus agents economics e sociaus dera Val d’Aran. En aguest sens, era sindica a lamentat qu’aguesti pressupòsti “non contèmplen era melhora d’aguestes inversions en Aran, totun, deth govèrn deth Conselh Generau d’Aran ençà trabalham damb es diferents departaments, coma es de Cultura, Sanitat o Territòri, entà poder revertir-les”.