• Laguens dera inversion de 81 milions qu’eth Ministèri d’Industria, Comèrç e Torisme amiarà a tèrme en auviatge istoric der hilat de Paradors, se contemple ua partida de mès de miei milion d’euròs entara reabilitacion dera tor e era restauracion dera capèla deth Parador Nacionau Gaspar de Portolà d’Arties

Aguesta setmana, eth Ministèri de Industria, Comèrç e Torisme a anonciat qu’eth Govèrn der Estat invertirà 81 milions d’euròs en patrimòni istoric de Paradores. Entre aguesti 81 milions, eth Parador d’Arties ne receberà 520.677 € entara reabilitacion dera tor e era restauracion dera capèla.

Aguesta inversion respon ath besonh de reabilitar, mantier e suenhar er immens patrimoni istoric que i a laguens der hilat de Paradors de Torisme, monuments dubèrti ath public pes quaus eth Govèrn apòste damb ua inversion istorica.

En cas dera Val d’Aran, aguesta inversion supausarà ua actuacion valorada en mès de miei milion d’euròs en Parador Nacionau Gaspar de Portolà d’Arties. En aguest sens, cau rebrembar que Gaspar de Portolà (1717-1786), militar e explorador, siguec coneishut per auer estat eth prumèr governador de Califòrnia e fondador des ciutats de San Diego e Monterrey.

Es Portolà èren ua familha dera petita noblesa, terratenents especializadi en bestiar cavalam e fòrça relacionadi damb eth pòble d’Arties, pr’amor qu’aquiu auien ua casa pairau qu’a dia d’aué se trape integrada en Parador Nacionau e dera quau se conserven era tor e era capèla enes quaus se centrarà era intervencion finançada per Estat.

Vielha, 28 de seteme de 2022