Ua aportacion dera Generalitat de 800.000 èuros permeterà méter en foncionament un dusau quiròfan en Espitau Val d’Aran

Era Comission Govèrn dera Generalitat – Conselh Generau d’Aran a acordat er ampliament des mejans transferidi ath Conselh Generau d’Aran en matèria de sanetat. Se tracte d’un ampliament dera aportacion economica dera Generalitat, per un impòrt de 800.000 èuros que permeterà finançar era remodelacion der Espitau Val d’Aran entà dispausar d’un dusau quiròfan, entre d’autes naues installacions.

Era Comission Govèrn dera Generalitat – Conselh Generau d’Aran s’amassèc ager pera tarde en Palai dera Generalitat, en ua amassada ordinària deth Plen dera Comission presidida peth secretari generau deth Departament de Governacion e Relacions Institucionaus, Lluís Bertran, en representacion dera vicepresidenta deth Govèrn, Joana Ortega. Lo acompanhèren eth secretari de Cooperacion e Coordinacion des Administracions Locaus, Marc Prat; eth director generau d’Administracion Locau, Jordi Souto; eth delegat deth Govèrn en Naut Pirenèu e Aran, Albert Alins, e eth secretari dera Comission e director dera oficina entath Desvolopament der Autogovèrn, Xavier Bernadí, ath delà des representants d’auti departaments dera Generalitat convidadi ara reünion per arrason dera matèria. Era representacion deth Conselh Generau, formada peth sindic d’Aran e vicepresident dera Comission, Carlos Barrera, siguec integrada peth vicesindic prumèr, Luís Carlos Medina, e pera rèsta de conselhèrs que ne hèn part.

Eth secretari generau de Governacion, Lluís Bertran, reïterèc qu’“es relacions institucionaus entre eth Govèrn dera Generalitat e eth Conselh Generau d’Aran son fòrça fluïdes e son pleaments abocades ara defensa e eth desvolopament der autogovèrn d’Aran”. Pendent era reünion, s’informèc der estat dera tramitacion dera prepausa de lei sus eth regim especiau d’Aran. Bertran, que refermèc era posicion deth Govèrn d’aufrir eth maximal supòrt, se mostrèc confiat qu’aguesta legislatura se pogue aprovar “aguesta lei tan demorada”, aprobacion que s’apoiridie produsir a finau d’an o pendent eth mes de gèr deth 2015.

Ena reünion, tanben se parlèc des convènis signadi des dera darrèra reünion dera Comission. Per un aute costat, eth sindic d’Aran, Carlos Barrera, informèc dera soscripcion d’un convèni damb eth Departament d’Interior damb ua aportacion economica de 35.000 èuros, entara creacion d’ua infrastructura de Proteccion Civiu en Aran que permeterà ath Conselh Generau dispausar d’un tecnic de Proteccion Civiu, d’un convèni en matèria de Comèrç, damb un impòrt de 30.000 èuros e d’un convèni en matèria d’Agricultura e Miei Ambient, damb un impòrt de 52.500 èuros.

Ath delà, d’un convèni de collaboracion entre eth Departament d’Interior e eth Conselh Generau d’Aran, signat en març de 2014, entara prevencion e escandilhament de huecs, e deth convèni damb eth Departament de Territòri e Sostenibilitat entara elaboracion deth Plan Territoriau deth Garona, que s’autrege entà eth ua subvencion de 50.000 èuros. Tanben se deishèc constància dera cession per part dera Agència Catalana de l’Aigua (ACA) d’ua part dera finca ath costat der EDAR de Vielha entà plaçar-i ua naua deishalheria, per un periòde de trenta ans.

En un aute orde de causes, ena reünion dera Comission tanben s’informèc dera activitat realizada en Conselh de Politica Lingüistica der Occitan Aranés, creat en mai de 2012 entà garantir eth finançament adequat e sufisent des politiques lingüistiques per relacion ar aranés e era coordinacion en aguest encastre entre era Generalitat e eth Conselh Generau d’Aran.

Ath delà dera session d’aué, enguan se preve ua auta reünion dera Comission ena tardor. Era darrèra session dera Comission Govèrn dera Generalitat – Conselh Generau d’Aran, convocada damb caractèr extraordinari, se celebrèc en Vielha, eth 29 de junhsèga de 2013, pòc dempús des ploges torrencials e es aiguats en Aran.