Era Comission Bilaterau a acordat crear ua comission de trabalh qu’elaborarà en termini de tres mesi ua prepausa de modèl de finançament, tau e coma preve era Lei 1/2015 deth Regim Especiau d’Aran

Era conselhèra Elsa Artadi destaquèc era fòrça bona sintonia entre es dues institucions e arregraïc ath sindic d’Aran era leiautat institucionau enes mesi deth 155

Eth sindic d’Aran, Carlos Barrera, avalore era reünion dera Comission Bilaterau coma ua des mès productives des darrèri ans

Barcelona, 17 d’octobre de 2018.- Eth Govèrn dera Generalitat e eth Conselh Generau d’Aran an acordat, en marc dera Reünion Bilaterau Generalitat-Conselh Generau d’Aran, era creacion d’ua comission de trabalh, formada per membres d’ambdues administracions, qu’elaborarà, en un termini de tres mesi, era prepausa d’un nau acòrd de finançament. S’encare atau, eth tram finau entà arténher definitiuaments aguest nau acòrd de finançament, que darà estabilitat e non requerirà d’ua aprobacion annau coma enquia ara, e, ath madeish temps, se da compliment ara Lei 1/2015 deth Regim especiau d’Aran qu’atau ac preve.

Era reünion a estat presidida pera conselhèra dera Presidéncia, Elsa Artadi, e eth sindic d’Aran, Carlos Barrera. Ena reünion tanben a participat era secretària generau dera Presidéncia, Meritxell Masó; eth secretari d’Administracions Locaus e Relacions damb Aran, Miguel Angel Escobar; eth secretari generau dera Vicepresidència, Albert Castellanos; era directora generau d’Administracion Locau, Rosa Vestit; era delegada deth Govèrn en Naut Pirenèu e Aran, M. Rosa Amorós; eth secretari d’Ahèrs Sociaus e Familhes, Francesc Iglesias; eth secretari generau der Espòrt, Gerard Figueras; eth director generau de Prevencion, Escandilhament d’Incendis e Salvaments, Manel Pardo;atau coma representants des departaments de Salut, de Territòri e Sostenibilitat e de Cultura. Per part deth Conselh Generau d’Aran, an assistit ara reünion eth sindic d’Aran, Carlos Barrera; eth vicesindic d’Aran e conselhèr de Planificacion Territoriau, César Ruiz-Canela; era conselhèra de Torisme, Desvolopament Economic e Salut e Benéster, Anna Díaz; eth conselhèr de Territòri, José Antonio Boya e eth secretari dera Comission Bilaterau d’Aran, Enrique Pérez.

Pendent era reünion, tanben s’an acordat es critèris qu’an de regir era prepausa de modèl de finançament: aguest a de vier determinat peth PIB catalan, er IPC, era nòrma de despensa e era corresponsabilitat fiscau entre ambdues administracions. En tot seguir aguesti critèris, era comission de trabalh redigirà ua prepausa de finançament que s’elevarà e aprovarà en ua Reünion Bilaterau extraordinària Generalitat-Conselh Generau d’Aran e ara seguida serà elevada en Govèrn entara sua aprobacion.

Era conselhèra dera Presidéncia, Elsa Artadi, a destacat eth besonh qu’Aran pogue auer un finançament que sigue mès estable, que dongue responsa as projèctes que s’an de sométer damb ua predictibilitat que non se li calgue negociar an darrèr an. Es critèris qu’an de regir aguest nau finançament son era autosufisença e era corresponsabilitat, segontes era Pòrtavotz deth Govèrn.

D’aguesta manèra, maugrat era aplicacion der article 155 e era consequenta paralisis des anteriors acòrds aprovadi entre es dues administracions, eth Govèrn dera Generalitat da compliment ara Lei 1/2015 en çò que tanh ath termini deth nau acòrd de finançament.

Pendent era amassada, tanben s’a aprovat er acòrd de finançament der an 2018 entre era Generalitat e eth Conselh Generau d’Aran, pendent de barrar darrèri detalhs que se finalizaràn es pròplèus dies en ua reünion en Departament d’Economia, segontes a explicat eth sindic d’Aran, Carlos Barrera, qu’a avalorat era reünion dera Comission Bilaterau coma ua des mès productives des mantengudes enes darrèri ans e a arregraït eth trabalh realizat des deth Departament dera Presidéncia, a trauès dera Secretaria d’Administracions e Relacions damb Aran.

En transcors dera reünion, tanben s’a encuedat der estat de tramitacion des acòrds de traspassi aprovadi ena darrèra Comission Bilaterau Generalitat-Aran. Aguesti traspassi son eth desvolopament de competéncies arreconeishudes en matèria d’organizacion deth territòri e urbanisme, er ampliament de mejans en matèria elipòrtoaria, e eth traspàs de foncions en matèria d’espacis naturaus. En çò que tanh ara organizacion deth territòri ja ei aprovat e publicat en DOGC per part deth Govèrn dera Generalitat, mentres que es auti dus traspassi s’aprovaràn enes pròplèus setmanes. Eth síndic d’Aran, Carlos Barrera, a destacat era estreta collaboracion damb eth departament de Territòri e Sostenibilitat que permetec contunhar en tot trabalhar ena negociacion de naui traspassi pesar dera aplicacion der article 155, e en tot hèr ua mencion especiau ara implicacion deth secretari generau d’aguest departament, Ferran Falcó, e ath secretari d’Abitat Urban e Territòri, Agustí Serra.

En çò que tanh ath traspàs deth servici integrau de Pompièrs e Emergéncies d’Aran, a agut un acòrd politic entà dar-li un impuls, e s’a fixat era data de fin de negociacion, eth pròplèu 4 de deseme, damb era volontat qu’eth conselhèr pendent era sua visita ar Aran pogue anonciar aguest acòrd. Era conselhèra, Elsa Artadi, soslinhèc que per es caracteristiques e magnitud deth traspàs aguest aurà de hèr-se efectiu escalonadament.

Pendent era reünion dera Comission Bilaterau, s’a acordat er impuls practicaments definitiu a qu’era Generalitat transferisque entà Aran ua dotacion pressupostària en matèria d’accion sociau entara cofinanciacion dera residéncia entà persones granes e centre de dia Sant Joan deth Baish Aran, qu’eth Conselh Generau d’Aran bastís en municipi de Les. Aguest ei un projècte que se preve que se barre enes pròplèus mesi qu’eth sindic d’Aran a avalorat coma un auanç sociau fòrça important entara Val d’Aran. Aguest ei un traspàs previst de formalizar eth pròplèu 31 d’octobre, pendent era reünion mantenguda entre eth sindic d’Aran e eth conselhèr de Trabalh, Ahèrs Sociaus e Familhes, Chakir Eth Homrani.

Era Comission tanben a acordat eth compromís dera Secretaria Generau der Espòrt de completar damb ua aportacion economica annau entath Conselh destinada ath foncionament deth Centre de Tecnificacion d’Espòrts d’Iuèrn e des sòns programes qu’eth Govèrn d’Aran n’ei eth titular, damb era collaboracion dera Secretaria Generau der Espòrt e era Federacion Catalana d’Espòrts d’Iuèrn. Per d’auta part, tanben s’encuedèc der acòrd politic entà hèr realitat era creacion des federacions esportiues araneses e era volontat per part dera Secretaria Generau der Espòrt d’ampliar era dotacion pressupostària de besonh entara coordinacion des naues federacions e entath foment der Espòrt en Aran.

Fin finau, era conselhèra dera Presidéncia a expressat era volontat politica qu’age un reconeishement dera nacionalitat aranesa en Catalonha que sigue tanben ua realitat en tot eth territòri catalan. Entà Artadi, ei ua manèra d’enriquir tot eth país, Catalonha, e tanben d’enfortir es laci entre eth pòble aranés e eth pòble catalan. En aguest sens, expliquèc que “mos auem conjurat non solaments a desplegar era lei 1/2015 de Regim Especiau d’Aran, qu’ei ua lei ambiciosa, mès tanben a trobar d’auti mecanismes entà que aguesta reconeishença sigue ua realitat”.