Eth president dera Generalitat de Catalunya, Carles Puigdemont, acompanhat deth vicepresident e conseller d’Economia, Oriol Junqueras, e dera consellera de Governacion, Meritxell Borràs, presidiren era prumèra reünion deth conselh institucionau de GovernsLocals.cat

Eth procès de debat servirà entà definir es bases dera Administracion locau del futur

Foto: Ruben Moreno

Eth Govern dera Generalitat de Catalunya metec ager en marcha eth procès de debat GovernsLocals.cat que prebotge amassa damb es autes administracions definir coma a d’èster era Administracion locau catalana deth futur. Eth trèt de gessuda lo dèc era prumèra reünion deth Conselh Institucionau, que se hec en Parlament de Catalunya, presidida peth president dera Generalitat, Carles Puigdemont; acompanhat deth vicepresident, Oriol Junqueras, e dera consellera de Governacion, Administracions Publiques e Abitatge, Meritxell Borràs. Tanben participèren eth sindic d’Aran, Carlos Barrera; eth prumèr tinent de baile der Ajuntament de Barcelona, Gerardo Pisarello; era presidenta dera Deputacion de Barcelona, Mercè Conesa; es presidents des deputacions de Girona, Lleida e Tarragona, Pere Vila, Joan Reñé e Josep Poblet, respectivaments; eth president dera Associacion Catalana de Municipis, Miquel Buch; eth vicepresident dera Federacion de Municipis de Catalunya, Josep Salom; e representants des sies grops parlamentaris.

Era consellera Borràs metec enfasi que “per prumèr còp” entà elaborar es bases d’aguesta legislacion se compde damb es votzes deth mon locau e enlòc de presentar es tèxtes dirèctaments des deth Govern o deth Parlament “se daurís un debat prigond en qué des deth mon locau se haràn dirèctaments es aportacions entà dessenhar es administracions locaus deth sègle XXI”.

“Cau revisar es esturments qu’auem entà dar responsa ara ciutadania e per açò impulsam un debat damb prigondor a on bailes e còssos deth país poguen participar de manèra clara e dirècta” expliquèc era titulara de Governacion, que soslinhèc qu’ “es cargues escuelhudi son es que coneishen era realitat de governar en marc locau e ei evident qu’era sua aportacion e experiéncia a d’èster clau entà bastir es leis que les afècten”.

Objectius e participacion de cargues

Eth procès de debat damb eth mon locau a coma objectiu elaborar es bases des leis qu’an de regir eth futur des govèrns locaus de Catalunya. Era organizacion territoriau, era organizacion des govèrns locaus, es relacions intergovernamentaus, era naua governança, era innovacion ena gestion publica locau e es finances locaus son es sies encastres de trabalh que se debateràn a toti es nivèus dera Administracion.

Bailes, presidents d’Entitats municipaus descentralizades e presidents de conselhs comarcaus poderàn participar presenciaument enes sessions de debat en territòri, que se haràn entre es mesi d’octobre e noveme. En aguestes sessions se debaterà sus cadun d’aguesti encastres e es resultats se haràn arribar ara rèsta de cargues entà que, via telematica, poguen hèr es aportacions corresponentes. Tanben s’establiràn diuèrsi procèssi participatius a nivèu municipau e s’arrecuelheràn opinions a trauès dera web governslocals.cat, a on i aurà esturments de debat des sies encastres de trabalh, ath delà d’un huelheton electronic que fomentarà era participacion.

Es documents se coordinaràn en un comitat tecnic format per representants de totes es administracions e se someteràn ara consideracion d’un grop d’assessors, que poderàn assistir es equipes des encastres de trabalh e aportar contenguts e coneishements, coma expèrts ena matèria.

Eth procès de debat finalizarà entre es mesi de gèr e hereuèr deth 2017, damb ua session a on s’aportaràn es resultats des sessions territoriaus e des aportacions telematiques des cargues. Atau, dera session finau gesserà un document que se enviarà ath Parlament de Catalunya e que servirà coma basa entà elaborar es futures leis des govèrns locaus.

Vielha, 29 de junhsèga de 2016

Conselh Generau d’Aran: Núria Sanjuan

Hònt: Generalitat de Catalunya/ Governacion