• Entara conselhèra de Coneishement, Angelina Cases, er hèt de realizar es Pròves d’Accés ara Universitat (PAU) en Aran supausarie ua grana oportunitat entàs joeni aranesi, que poirien evitar atau eth desplaçament enquia Lhèida e part dera despesa economica, que supausen un greuge comparatiu damb d’auti endrets

Era declaracion institucionau presentada peth govèrn deth Conselh Generau d’Aran ath conselhèr d’Ensenhament e ara Delegacion Territoriau de Lhèida entà qu’es Pròves d’Accès ara Universitat (PAU) se realizen ena Val d’Aran a recebut ua responsa favorabla per part deth director des Servicis Territoriaus d’Educacion en Lleida, Carles Vega, qu’a mostrat eth sòn compromís entà hèr arribar aguesta demana ara Secretaria d’Universitats e Recèrca.

Vega a manifestat qu’era demana deth govèrn aranés les semble “ua demana justa e que se pòt hèr possible, pr’amor dera distància que separe era Val d’Aran de Lleida e sustot pr’amor qu’Aran ei un territòri damb lengua pròpria, identitat, cultura e autogovèrn”.

Era conselhèra de Coneishement deth Conselh Generau, Angelina Cases, s’a mostrat “fòrça satisfèta per aguesta responsa, demoram qu’eth nòste escolanat age, a compdar d’ara, era oportunitat de realizar es PAU en Institut d’Aran, en tot evitar atau eth desplaçament enquia Lhèida e era despesa economica que supausen un greuge comparatiu damb d’auti endrets”.

En çò que tanh as Pròves d’Accés ara Universitat d’enguan, damb era crisi sanitària e sociau provocada peth COVID-19, eth sindic d’Aran, Francés Boya, afirme que “dejà se trabalhe entà qu’es nòsti joeni poguen realizar era PAU en Institut d’Aran entà evitar es majors risqui de contagi possibles”.

Rebrembam qu’aguesta declaracion institucionau siguec aprovada per unanimitat en plen deth Conselh Generau d’Aran eth passat mes de març e que siguec presentada, a instància deth sindic, pes pròpris escolans der Institut d’Aran.