• Era Generalitat de Catalunya aprovèc ager eth Decret de traspàs de foncions ath Conselh Generau d’Aran en matèria de gestion de grani carnivòrs, qu’a de perméter ath govèrn aranés èster mès agil e eficient ara ora de solucionar es problematiques des ramadèrs derivades dera convivéncia damb er os

Eth govèrn catalan a aprovat dejà eth Decret de traspàs de foncions dera Generalitat de Catalunya ath Conselh Generau d’Aran en matèria de gestion de grani carnivòrs dera fauna sauvatja protegida ena Val d’Aran, un traspàs qu’eth govèrn d’Aran artenhec eth passat an 2020 mès qu’ère ara demora dera sua aprobacion per part der executiu catalan.

“Aguesta competéncia includís era execucion des actuacions de gestion des grani carnivòrs mejançant eth seguiment des sues populacions e eth desvolopament des politiques de prevencion e compensacion des danhs produsidi per aguesti animaus as activitats ramadères presents en territòri”, explicaue era sindica d’Aran, Maria Vergés, en tot híger que “aguest traspàs permeterà agilizar tota era tramitacion des ajudes as ramadèrs deth territòri e, molt especiaument, totes aqueres mesures que poguen ajudar a conciliar era ramaderia en país damb era preséncia der os”.

En aguest sens, eth conselhèr de Territòri, Paisatge e Gestion Ambientau, Francés Bruna, afirmaue que: “deth govèrn deth Conselh Generau d’Aran ençà dejà auem amiat a tèrme diuèrses actuacions entà melhorar era convivéncia dera ramaderia e es grani carnivòrs, coma ei eth cas dera creacion des ajudes ath bestiar non retornat o era modificacion deth decrèt de danhs a fin d’aumentar eth valor indemnizable des atacs e equiparar-lo ath dera rèsta de comunitats vesies”.

Damb motiu d’aguest traspàs de competéncies, se crearà ua comission de coordinacion tecnica integrada per dues persones deth Departament de Departament d’Acció Climàtica i Agenda Rural dera Generalitat de Catalunya e dues mès deth Conselh Generau d’Aran. Aguesta comission, que s’amassarà coma minim dus còps ar an, aurà coma objectius establir ua estrategia de trabalh comuna, e establir mecanismes de coordinacion entà mantier ua accion conjunta ena gestion dera fauna sauvatge, entre d’auti.