• Damb er objectiu de dinamizar e potenciar era activitat economica deth territòri, condicionada pera crisi provocada peth COVID-19, eth govèrn deth Conselh Generau d’Aran a aumentat enguan era dotacion de personau temporau tar ostiu

• Eth sindic d’Aran insistís ena importància qu’a entath govèrn aranés trabalhar ena dinamizacion economica e eth supòrt as persones en caumatge dera Val d’Aran, qu’en aguest cas concrèt trabalharan ena reabilitacion de diuèrsi refugis deth territòri

Aué s’an incorporat ara brigada de servicis deth Conselh Generau d’Aran 11 peons e 4 oficiaus de prumèra, 15 persones contractades temporaument peth govèrn aranés entara tempsada d’ostiu que, deuant es 10 persones contractades en 2019, aumenten un 50% aguest tipe de contractacions.

“Pr’amor dera crisi sanitària, economica e sociau provocada peth COVID-19, ara mès que jamès ei important entath govèrn d’Aran trabalhar ena dinamizacion economica e eth supòrt as persones en caumatge deth nòste territòri”, afirme eth sindic d’Aran, Francés Boya, que hig que “ath delà, damb aguestes contractacions ampliam eth servici dera nòsta brigada, e es persones contractades amiaràn a tèrme un trabalh fòrça de besonh en tot trabalhar ena reabilitacion des nòsti refugis de montanha, que son tanben un atractiu toristic”.

Mès concretament, s’amiaràn a tèrme trabalhs en exterior e interior des refugis dera Bassa d’Oles, Plan Batalhèr e Saut deth Pish. Se renauirà er interior en tot apraiar es problèmes d’umitats, es banhs, era connexion d’aigua e er enlumenat, se repararàn es tets e se pintaràn tant es façades coma er interior d’aguesti refugis.