• Accion Aran 20/30 ei ua iniciativa participativa iniciada peth govèrn aranés entà replantejar eth futur d’Aran degut ara crisi sanitària e sociau provocada peth COVID-19 

Pr’amor dera crisi deth COVID-19, eth modèl economic dera Val d’Aran s’a vist grèument afectat e eth territòri a per deuant un rèpte fòrça important. Damb era iniciativa Accion Aran 20/30, eth govèrn deth Conselh Generau d’Aran inície un procès participatiu damb totes aqueres persones que s’i volguen ahíger entà collaborar ena regeneracion dera aucupacion e dera activitat economica.

Accion Aran 20/30 ei un procès de debat entà consensuar entre toti e totes possibles accions e linhes de trabalh que mos permeten afrontar, de manèra immediata, es besonhs e urgéncies deth moment, especificament en encastre economic e laborau.

Entà participar, sonque ei de besonh ramplir eth qüestionari que traparatz en aguest enlaç abantes deth 5 de mai. Un còp remassada aguesta informacion, s’organizaràn grops de trabalh entà debàter conjuntament de quina forma se pòt bastir un front comun qu’eth Conselh Generau d’Aran e d’autes administracions publiques poguen impulsar amassa.

En cas deth sector toristic, qu’aglutine era major part d’empreses e activitat economica d’Aran, se daurirà enes pròplèu dies un procès especific e en parallel entà trabalhar de forma urgenta es sòns besonhs mès immediats. Aguest procès se coordinarà damb Accion Aran 20/30, mès aurà eth sòn pròpi espaci e ritme de trabalh. Es dus procèssi non son excludents, per tant, quinsevolh persona qu’atau ac volgue, poirà participar en andús projèctes sense cap de problèma.

Aguesti debats an d’èster eth punt de partida d’un procès de mès long recorrut que mos permete generar un plan d’accion entà desvolopar un modèl territoriau de futur entara Val d’Aran.

Entà quinsevolh dubte, vos podetz dirigir via email a: r.barella@aran.org.