• Aguest projècte europèu, en que participen eth departament de Lengua deth Conselh Generau, Lo Congrès e es universitats de Tolosa Lo Miralh e Lhèida, servirà entà plaçar er aranés en aplicacions com es diccionaris en linha e enes utisi de reconeishença vocau

Eth passat dimèrcles, 20 de març, auec lòc ena sedença deth Conselh Generau d’Aran era prumèra amassada deth projècte Linguatec-IA, inaugurada pera sindica d’Aran, Maria Vergés, e presidida peth director de Lo Congrès, Benaset Dazéas.

Er objectiu d’aguest projècte ei digitalizar eth còrpus lingüistic occitan e tanben eth de lengües coma eth basc e er aragonés, e a de servir entà plaçar er aranés en aplicacions com es diccionaris en linha e enes utisi de reconeishença vocau.

Ena prumèra amassada de trabalh de Linguatec-IA i participèren ua dotzea de persones, e compdèc damb era preséncia d’expèrts en lingüistica aplicada de Lo Congrès permanent de la lenga occitana, er organisme qu’a desvolopat era tecnologia entar occitan, professors dera Universitat de Tolosa Lo Miralh e dera Universitat de Lhèida, estudiants e es tecnics deth Departament de Lengua deth Conselh.

Aguest projècte ei cofinançat damb hons POCTEFA e ei un pas estrategic entà consolidar un hilat d’excéllencia en inteligència artificiau entara construccion d’ua infraestructura lingüistica transtermièra.