• Pendent aguesta amassada, era sindica d’Aran e eth vicesindic e conselhèr d’Economia, Torisme e Foncion Economica an explicat en detalh ath president e as membres dera junta deth Grèmi ahèrs d’interés entath sector toristic dera Val d’Aran, coma es ajudes deth Conselh Generau ath sector empresariau aranés, eth Plan de Sostenibilitat Toristica o es actuacions previstes entara sason d’ostiu

Era sindica d’Aran, Maria Vergés, e eth vicensindic e conselhèr d’Economia, Torisme e Promocion Economica, Juan Antonio Serrano, s’an amassat aguest maitin damb eth president deth Grèmi d’Ostalaria dera Val d’Aran, Xacobe Bartolome, e es membres dera junta d’aguest organisme entà tractar diuèrsi ahèrs d’interés entath sector toristic deth territòri.

“Pendent aguesta amassada auem metut en comun damb eth Grèmi es disparières accions que s’amien a tèrme der airau de torisme deth Conselh Generau d’Aran ençà”, explicaue era sindica d’Aran, en tot híger que: “entath govèrn d’Aran ei important mantier ua relacion bidireccionau e compdar damb eth supòrt e collaboracion deth Grèmi d’Ostalaria e es sòns sòcis, entà conéisher era situacion e es prepauses deth sector, atau e coma auem hèt pendent era sason d’iuèrn a trauès dera taula de trabalh, ena que i èren presents tanben representants de Baqueiria Beret e responsables deth sistèma sanitari aranés, entà afrontar es efèctes dera COVID-19”.

“Eth sector toristic a estat fòrça castigat pes restriccions establides pera pandèmia e, per aguest motiu, deth govèrn deth Conselh Generau d’Aran ençà auem creat ua ua linha d’ajuts qu’a coma finalitat tractar de palliar, en marc des nòstes competéncies, era afectacion ena activitat empresariau dera Val d’Aran, e que se concrète en ajudes destinades a subvencionar  eth 50% deth rebut de lordères der an 2020”, afirmaue eth vicesindic, que higie que: “ath madeish temps, èm conscients qu’eth nòste modèu economic a de besonh un cambi e damb eth Plan de Sostenibilitat, dotat de 2,5 milions d’euròs, sajam de convertir Aran en ua destinacion verda e sostenible a trauès de diuèrses actuacions centrades en ahèrs coma era mobilitat, era diversificacion de punts d’interès naturau, era apòsta pes tecnologies e era innovacion e era promocion deth comèrç locau e era agroalimentacion”.

Entre d’auti ahèrs, s’an tractat tanben es diferentes accions previstes entà afrontar aguesta sason d’ostiu.