Eth sindic d’Aran, Carlos Barrera, s’a amassat damb era equipa de Govèrn deth Conselh Generau d’Aran e damb eth geòleg deth Conselh Generau d’Aran, Jordi Gavaldà, entà parlar sus er estat dera pista dera ribèra de Valarties dempús deth botàs deth passat dissabte, 12 de mai.

Era pista ja se dauric eth deluns, 13 de mai, gràcies ara intervencion conjunta deth Conselh Generau d’Aran e ar Ajuntament de Naut Aran.

En un punt deth botàs i auie ua linha electrica de mieja tension qu’Endesa deishèc dehòra de servici entà garantir era seguretat des persones que se trapauen en trabalhant damb es machines. Era rapidesa entà poder daurir eth tram dera pista de Valarties afectada ei tanben gràcies ara predisposicion dera empresa Hormaran.

Es depòsits d’aigua potabla non an patit cap desperfecte estructurau e se garantís atau eth servici d’aigua potabla en pòble d’Arties.

Eth sindic d’Aran, Carlos Barrera, a explicat que s’a demanat ar Institut Cartografic e Geologic de Catalonha un estudi entà esclarir es causes deth botàs.

Ara Confederación Hidrográfica del Ebro s’a sollicitat que determine nauaments era limitacion der arriu Valarties e atau facilitar as proprietaris des finques afectades era recuperacion des madeishi.

A ENDESA s’a demanat hèr un recorregut per interior deth canau amassa damb es geòlegs deth Conselh Generau d’Aran e der Institut Cartografic e Geologic de Catalonha entà constatar er estat deth canau e poder completar era analisi integrau dera configuracion dera montanha.

Vielha, 16 de mai de 2018

Conselh Generau d’Aran: Núria Sanjuan