• Ager se presentèc, de forma virtuau, era estrategia ideada peth govèrn deth Conselh Generau d’Aran entà iniciar, de forma conjunta damb era ciutadania aranesa, un procès de diversificacion dera economia deth territòri

Pendent era tarde d’ager, 130 persones participèren ena presentacion virtuau dera estrategia de futur Aran Accion 2020-2030, ua estrategia ideada peth govèrn deth Conselh Generau d’Aran e que, atau coma afirme eth Sindic d’Aran, Francés Boya, a coma objectiu “impulsar bères accions que mos permeten iniciar un procès de diversificacion dera economia deth territòri”.

Aran Accion 20/30 s’a plantejat coma un procès de debat ciutadan, que recuelh e consensue propòstes entà incidir ena regeneracion dera aucupacion e dera activitat economica dempús dera crisi deth COVID-19, mès que tanben dongue responsa a d’auti besonhs deth territòri coma era retencion deth talent des joeni, era innovacion o eth suenh deth miei ambient.

En aguesta presentacion virtuau participèren eth Sindic d’Aran, Francés Boya, era tecnica dera empresa mOntanyanes de desvolopament locau, Eva Tarragona, eth director dera Escòla de Negòcis deth Pirenèu (Grop Barrabés), Aurelio Garcia, e era dinamizadora economico-laborau deth Conselh Generau d’Aran, Ruth Barella.

Pendent aguesta amassada, se presentèren es conclusions deth qüestionari lançat peth Conselh Generau hè quauques setmanes (e que responeren 201 persones) entà conéisher es principaus preocupacions des aranesi e araneses deuant era crisi deth COVID-19, e se presentèc eth plan de trabalh que se seguirà a compdar d’ara entà desvolopar aguest plan estrategic sus era activitat economica dera Val d’Aran.

Totes es persones que s’an inscrit en aguest projècte participaràn enes sessions d’ideacion e accion dividits en grops de trabalh segontes diferents airaus deth sòn interès: agroalimentacion, economia verda, espòrt, tecnologia, servicis as persones, innovacion e talent e formacion.

Cau rebrembar que existís tanben un projècte parallel destinat especificament ath sector toristic e en quau se trabalharà tanben en grops de trabalhs dividits segontes es diferents sectors: ostalaria e lotjaments, restauracion, comèrç e empreses d’activitats.

Entath govèrn deth Conselh Generau d’Aran, aguestes iniciatives an d’èster eth punt de partida d’un procès de mès long recorrut que permete generar un plan d’accion entà desvolopar un modèl territoriau de futur entara Val d’Aran.