• Eth sindic d’Aran s’a amassat aguesta setmana damb es alcaldes deth territòri entà presentar-les aguesta naua estrategia forestau que se base en un profitament sostenible des bòsqui dera Val d’Aran

Aguesta setmana eth sindic d’Aran, Francés Boya, e es conselhèrs de Territòri, Paisatge e Gestion Ambientau, Francés Bruna e Oriol Sala, amassa damb eth degan deth Collègi d’Enginhèrs Forestaus, Eduardo Rojas, e eth coordinador de politica forestau deth Pirenèu, Paco Cano, presentèren as alcaldes e alcaldesses deth territòri eth nau Mecanisme de Gestion Forestau d’Aran.

“Aguesta naua estrategia forestau se base en un profitament sostenible des nòsti bòsqui, en tot apostar pera bioeconomia e era reinversion enes infraestructures de montanha”, afirme eth sindic d’Aran, en tot híger que: “çò que preten eth govèrn deth Conselh Generau d’Aran ei pactar un nau modèl de governança forestau en base a un acòrd institucionau damb es ajuntaments e EMD’s deth territòri, damb qui mos amassaram tanben en brèu”.

Ena actualitat, es recorsi forestaus dera Val d’Aran son fòrça infrautilizadi e, de hèt, Aran ei eth territòri deth Pirenèu catalan damb menor grad de profitament deth creishement.

“Recuperar era gestion forestau ei clau entà arténher uns bòsqui mès resilents ath cambi climatic e as incendis forestaus, ath temps que podem generar ua economia verda ath torn des nòstes montanhes”, assegure Boya. E hig que “auem ath torn d’ues 15.000 tones de husta disponibles cada an que s’a de profitar e que pòt milhorar, per ua part, era nòsta qualitat ambientau e, per ua auta, era economia des nòsti ajuntaments, pr’amor qu’ei un recors pròpri que sonque mos cau saber emplegar”.

Damb era creacion d’aguest nau mecanisme, se preten profitar eth potenciau des bòsqui aranesi e favorir era economia des ajuntaments aranesi, ath còp que s’apòste per ua energia mès neta e sostenible gràcies ath profitament dera biomassa.