• Aguesta setmana era vicesindica 1a, Maria Vergés, e era conselhèra de Coneishement, Angelina Cases, s’amassauen damb representants des centres educatius aranesi entà presentar-les aguest projècte e tà establir es critèris dera sua implementacion

Eth Conselh Generau d’Aran presentaue ager eth Programa KIVA contra eth sètge escolar, impulsat des deth departament d’Igualtat, Salut e Benèster, as direccions des centres educatius d’Aran e der EAP.

Aguest projècte s’auie presentat dejà ena passada legislatura mès demorèc arturat e eth nau govèrn deth Conselh Generau d’Aran a decidit implementar era prumèra fasa entà hèr front ara grèu problematica deth sètge escolar que, segontes es donades de Save the Childre, afècte a 1 de cada 10 mainatges en España, a on un 9,3% des alumnes a patit bèth tipe de sètge.

Eth projècte KIVA contra eth sètge cerque trabalhar non sonque damb era victima e er assatjador, senon que vò hèr a veir ath conjunt der escolanat que toti amassa pòden cambiar aguesta situacion. Ei provat qu’ es observadors an un ròtle clau entà acabar damb eth bullying e pòden decidir èster part dera solucion en compdes d’ignorar eth problèma.

Eth govèrn d’Aran ei totaument comprometut damb  era luta contra es problematiques sociaus qu’afècten ara poblacion, coma pòt èster eth sètge o era violéncia de genre, e pròva d’açò ei eth trabalh que desvolope eth departament d’Igualtat, Salut e Benèster ençà entà cercar  solucions ad aguestes lacres sociaus.

“Es donades mos demòstren qu’era Val d’Aran non ei aliena ad aguesta problematica e qu’eth sètge escolar ei present en nòste territòri” manifestaue era vicesindica Maria Vergés, e higie que: “damb aguest programa eth govèrn deth Conselh Generau preten redusir aguestes donades, sustot trabalhant dera prevencion ençà e en coordinacion damb eth pròpri departament d’Ensenhament dera Generalitat”.

Entà Angelina Cases, conselhèra de Coneishement, “era apòsta que hè eth govèrn damb aguest ahèr, tot e non auer competéncies en airau educatiu, demòstre tanben er interés qu’auem ena educacion en Aran”.

Eth programa KIVA, qu’a era sua origina en Finlandia e qu’a dejà uns ans de rodatge damb fòrça boni resultats, cerque melhorar era conviuença escolara en tot redusir e previer es casi de sètge e minimizar es sòns efèctes negatius.

N’aguest sens, dempús dera amassada d’ager, eth govèrn aranés a emplaçat as centres educatius entà ua pròplèu amassada dempús des vacances de Nadau entà que poguen avalorar era implantacion enes escòles d’aguest projècte.