• Era sindica d’Aran a reclamat tanben ath govèrn dera Generalitat qu’abilite es ajudes e recorsi de besonh entà palliar es efèctes des restriccions d’aguesti mesi en teishit sociau e empresariau aranés

Eth govèrn deth Conselh Generau d’Aran a sollicitat ath president en foncions dera Generalitat de Catalunya, Pere Aragonès, era conselhèra de Salut, Alba Vergés, e eth conselhèr d’Interior, Miquel Sàmper, que s’age en compde era singularitat e especificitat dera Val d’Aran ara ora d’aplicar es naues mesures de mobilitat qu’entren en vigor a compdar d’aué, 7 de gèr, e que s’aplique un confinament comarcau e non municipau en nòste territòri.

“Aran compde damb nau municipis repartidi en trenta tres nuclèus de poblacion, e bona part des sòns abitants an de besonh desplaçar-se a d’auti municipis entà poder accedir ara majoria de servicis basics que non se trapen en sòn municipi de residéncia”, manifestaue era sindica d’Aran, Maria Vergés, en tot híger que: “damb er objectiu de garantir er accés de tota era ciutadania d’Aran as equipaments sociosanitaris, culturaus e comerciaus que requerissen, auem sollicitat que se modifique er ambit dera restriccion de mobilitat de municipau a comarcau”.

Per un aute costat, eth govèrn d’Aran a demanat tanben ara Generalitat qu’abilite es ajudes e recorsi de besonh entà palliar es efèctes des restriccions d’aguesti mesi en teishit sociau e empresariau aranés.