Vielha, 14 de seteme de 2018.- Damb eth començament deth Cors Acadèmic 2018 -2019 que comence tanben es sues amassades eth Grop de Convèrsa Occcitana/Aranesa dera UdL.

Per quatau an consecutiu e a compdar deth dia 27 de seteme, toti es dijaus entàs 19:30 ores en Campus de Cap Pònt en edifici deth CTT dera UdL s’amasse eth Grop de Convèrsa.

Er objectiu d’aguest grop qu’ei de practicar era lengua de manèra informau laguens d’un grop de convèrsa amiat per un dinamizador nadiu non professionau.

Damb era practica orau, en dubèrt, intensiva, biais taula redona e sense professors que hèsquen un seguiment didactic, se preten qu’es participants perdem era pòur de parlar, guanhen autoconfidança e la trasladen dehòra dera sala d’estudi.

Es sessions son damb un nombre redusit d’assistents per session pr’amor qu’ei çò mès semblable ara realitat e permet ua frequéncia d’intervencions individuaus mès grana. Era activitat qu’ei gratuïta e ei dubèrta a quinsevolhe que sigue interessat en practicar era lengua aranesa.

Aguesta iniciatiua ei organizada e amiada pera Associacion Es Paums amassa damb era associacio Volontaris pera Lengua, der Institut Aranés, e compde damb eth supòrt der Institut de Llengues dera Universitat de Lleida e deth Departament de Politica Lingüistica deth Conselh Generau d’Aran.

Tà auer mès información cau contactar damb er email espaums@gmail.com

Enguan, ath delà deth Grop de Convèrsa presenciau se poderà practicar aranés ena Sala Virtuau Bòsc de Varicauba (www.volontarisperalengua.com).