Eth Palai d’Espòrts de Vielha, acuelhec eth passat mes de junh era VIIIau edicion des 30 ores de fotbòl sala Vila de Vielha, en tot consagrar-se atau coma un des tornegi mès prestigiosi laguens deth panorama deth fotbòl sala dera provincia.

En totau sigueren 18 equipes es que disputèren eth torneg: 9 dera Val d’Aran e 9 de dehòra deth territòri, en tot èster era majoria d’eri equipes de Lhèida o environs, en tot poder díder que çò de melhor deth fotbòl sala lheidatan se dèc cita en torneg.

Era dusau fasa deth torneg la disputèren un totau de 8 equipes, cap d’eri aranesi, en tot èster 4 de Lhèida, 2 de Sitges, 1 de Badalona e 1 deth municipi tarragonin dera Espluga de Francolí.

Es resultats de semis sigueren:

– “Forza molle” (Mollerussa) 7- “Joga bonito” 8 (dempús de 5 min. de prorròga)
– “Milan yoigo Solsona” 1- “40×20 som futsal” 1 (passèren aguesti darrèri per penaus)

Era finau la disputèren es equipes: “Joga bonito” (Badalona) e “40×20 som futsal” (Lhèida), a on eth “Joga bonito” guanhèc damb un clar 4 a 1.

Era estonada deth torneg siguec era eliminacion ena fasa de grops der actuau campion deth torneg, “Cafeteria Sandra- Casa de Aragón” e era victòria d’un debutant en torneg coma siguec eth “Joga bonito”, que realizèc ua autentica proesa, pr’amor que se consagrèc campion de manèra mès que mereishuda damb ua equipa formada unicaments per sies jogadors e qu’arribèren fòrça justi de fòrces ena finau.

Aguesta edicion siguec un succès de participacion, en tot destacar eth gran nivèu de toti es equipes, que demorèc rebatut ena rapida eliminacion der actuau campion (“Cafeteria Sandra- Casa de Aragón”), e sustot era proesa que realizèren es 6 gojats de Badalona que guanhèren un torneg durissim e que demorarà entath rebrembe.