• Aguesta certificacion arribe dempús de dus ans de trabalh per part der equip der airau de laboratori

• Damb aguesta qualificacion s’estandarizen es circuits intèrns e es protocòls deth laboratòri, garantint era qualitat enes diferents procèssi realizadi

Eth laboratòri der Espitau Val d’Aran a obtengut enguan eth certificat UNE-EN-ISO 9001:2015, ua certificacion qu’arribe dempús d’un intens trabalh d’adaptacion de lèu dus ans per part des tecnics d’aguest airau der espitau aranés.

Aguest certificat, explique eth responsable de laboratòri clinic, Luis Ángel Roncero, “supause ua estandarizacion des circuits intèrns e es protocòls deth laboratòri, en tot atier a quinsevolh incidéncia que se pogue produsir entà poder implementar es mesures de melhora que siguen de besonh” e higie que “ère de besonh entà èster ath madeish nivèu que d’auti espitaus de territoris vesins”.

Era implicacion qu’assumís eth laboratòri damb aguesta certificacion a dus vessants, d’un costat, en çò que hè referéncia ath pacient, assegure ua diminucion d’errors en tot eth procès d’analisi e liurament de resultats, e d’aute costat, en referéncia ath personau de laboratòri, assegure ua forma de trabalh estandardizada tostemp jos uns procediments e protocòus establidi, que dan coma conseqüéncia ua disminucion de possibles hònts d’error.

Era norma ISO 9001:2015 ei ellaborada pera Organizacion Internacionau entara Estandarizacion (ISO en anglés), un organisme independent qu’establís es requisits entà un Sistèma de Gestion de Qualitat e que se pòt emplegar entara sua aplicacion intèrna enes empreses  e qu’amasse a mès d’un million  organizacions en mès de 170 païsi de tot eth mon

Entara conselhèra d’Igualtat, Salut e Benèster d’Aran, Maria Vergés, “era concession d’aguest reconeishement garantís qu’eth laboratori der Espitau Val d’Aran (Aran Salut) complisque damb un estandar de qualitat reconeishut a nivèu internacionau”. Atau madeish higie que “arténher aguesta consideracion a estat possible gràcies ath trabalh e dedicacion der equip de professionaus deth laboratori, as qui eth govern deth Conselh Generau d’Aran vò reconéisher e arregraïr eth sòn esforç”.

Èster laguens d’un sistèma de qualitat certificada damb era Nòrma ISO 9001:2015, implique ua recerca continuada de metòdes analitics mès eficients, ua formacion contunhada deth personau de laboratòri e un desvolopament de bones practiques en cèrca dera seguretat deth pacient.