• Aguesta qualificacion, obtenguda per prumèr còp ara hè tres ans e renauida annaument gràcies ar intens trabalh d’adaptacion e melhora per part des professionaus d’aguest airau, supause ua estandarizacion des circuits intèrns e es protocòls deth laboratòri, en tot garantir atau era qualitat enes procèssi e un melhor servici as persones

Eth laboratòri der Espitau Val d’Aran manten eth sòn certificat de qualitat ISO 9001:2015, obtengut per prumèr còp eth passat 2019. Aguest certificat se renauís de forma annau e se realize ua auditoria mès extensa cada tres ans, auditoria qu’er Espitau a superat aguest madeish ostiu damb fòrça exit, damb eth supòrt deth Departament de Qualitat deth Laboratòri de Referéncia de Catalunya, frut dera aliança estrategica que s’establic era passada primauera.

Eth certificat ISO supause ua estandarizacion des circuits intèrns e es protocòls deth laboratòri, en tot atier a quinsevolh incidéncia que se pogue produsir entà poder implementar es mesures de melhora que siguen de besonh, en tot aufrir atau uns resultats mès concrets e un melhor servici as usatgèrs e usatgères.

Era implicacion qu’assomís eth laboratòri damb aguesta certificacion a dus vessants, d’un costat, en çò que hè referéncia ath pacient, assegure ua disminucion d’errors en tot eth procès d’analisi e liurament de resultats, e d’un aute costat, en referéncia ath personau de laboratòri, assegure ua forma de trabalh estandardizada, tostemp jos uns procediments e protocòus establidi, que supausen coma conseqüéncia ua disminucion de possibles hònts d’error.

Entara sindica d’Aran, Maria Vergés, eth renauiment annau e auer superat damb exit era darrèra auditoria “supause un reconeishement ara labor deth personau deth laboratòri pendent es darrèri ans, en tot amiar a tèrme un trabalh intens d’adaptacion damb er objectiu de melhorar es procèssi e era atencion que se balhe as persones d’Aran Salut ençà”.

Vielha, 27 de seteme de 2022