• Tanben s’a enviat a restaurar era colleccion de 26 plaques estereoscòpiques de veire datat entre es ans 1911-1920 e depausades en Archiu peth senhor Antonio Moyes Valls.

Eth Libre de capítols de Gessa presentaue diuèrses patologies (lordèra, pèrta de supòrt, talhs, huelhes desgatjades…) que maumetien eth sòn estat de conservacion. Es trabalhs s’an realizat en talhèr Estudi B2 de Barcelona, que restaure era documentacion depausada en Archiu a compdar der an 2000. Era restauracion a consistit en desmuntatge deth libre, limpiesa mecanica e desinfeccion, limpiesa semiumida, desacidificacion, reaprèst, consolidacion deth supòrt, aplanat, cosut e enquadernacion.

Ath delà, s’a enviat entà èster restaurada era colleccion de 26 plaques estereoscòpiques de veire, depausades en Archiu peth senhor Antonio Moyes Valls. Es imatges, datades entre es ans 1911-1920, corresponen a diuèrsi pòbles (Canejan, Bossòst, Betren, Tredòs e Salardú) e zònes (Espitau de Vielha, Pòrt dera Picada, Molières, Aneto, Colomèrs…) dera Val d’Aran. Aguesta colleccion ei fòrça importanta tara istòria e patrimòni documentau d’Aran, pr’amor que son es uniques plaques de veire que se conserven en archiu. Era colleccion presente diuèrses patologies en tot trobar-se laguens d’envelòpes de papèr, qu’en bèth un moment arreceberen fòrça umiditat. Aguesta a provocat, qu’eth papèr s’age enganchat ara emulsion dera fotografia en tot dificultar era sua manipulacion.

Vielha, 20 de junh de 2018

Conselh Generau d’Aran: Núria Sanjuan

Hònt e Fotos: Archiu Generau d’Aran