• Damb ua inversion de 830.000€, eth Ministèri de Transpòrts, Mobilitat e Agenda Urbana anoncièc ager qu’a formalizat eth contracte de servicis entà redactar eth projècte de condicionament d’aguesta via en tram entre era boca nòrd deth tunèl e Vielha e er estudi d’implementacion de carrils addicionaus d’auançament en cas que sigue possible

• Aguest anonci se correspon damb eth compromís assumit peth govèrn der Estat damb es territòris afectadi peth pas dera N-230, atau coma manifestèc hè pòc mens d’un an eth secretari generau d’infraestructures der Estat ena sua visita tath Conselh Generau d’Aran

• Eth govèrn d’Aran mòstre era sua satisfaccion pes rapids auanci ena melhora d’aguesta carretèra tant reclamadi peth territòri

Eth Ministèri de Transpòrts, Mobilitat e Agenda Urbana (Mitma) anoncièc ager que dejà a formalizat, per un impòrt de 830.000€, eth contracte de servicis entara redaccion deth projècte “Condicionament dera carretèra N-230 mejançant ampliacion de plataforma e estudi de implementacion de carrils addicionaus d’auançament. Tram: Boca Nòrd deth Tunèl Juan Carlos I – Vielha”.

“Hè mens d’un an, eth secretari generau d’infraestructures der Estat, Xavier Flores, acompanhat deth secretari generau tath Rèpte Demongrafic, Paco Boya, visitaue era Val d’Aran en ua amassada qu’auec lòc ena sedença deth Conselh e a on i èrem presents representants de toti es territòris afectadi peth pas dera N-230, a on se presentèren es projèctes enmarcadi ena Agenda N-230” rebrembaue era sindica d’Aran, Maria Vergés, en tot híger que: “d’alavetz ençà, auem artenhut melhores istoriques tà ua N-230 qu’a demorat desbrembada pendent decades”.

Er objècte d’aguest projècte serà desvolopar es accions de besonh entà melhorar era seguretat viau en aguest tram entre era boca nòrd e Vielha, de 6 km de longada, mejançant era ampliacion dera sua plataforma enquia arténher ua cauçada de 7m d’amplada damb trepaders d’1m, artenhent era maxima intgracion ambientau. Atau madeish, s’estudiarà era possibilitat d’establir carrils addicionaus d’auançament enes trams que poguen èster aptes.

Cau rebrembar que, d’octobre de 2022 ençà, s’a anonciat un contracte de servicis entara redaccion deth projècte de condicionament d’aguesta via damb trams de tres carrils entre Benabarre e Sopeira, s’a licitat eth projècte de melhora deth tram dera boca nòrd deth Tunèl a Vielha, s’a hèt publica era aprobacion der estudi informatiu de condicionament dera via en sòn tram de Sopeira ara boca sud deth Tunèl e a gessut a licitacion eth projècte de condicionament deth tram entre era boca nòrd deth Tunèl e Vielha.

Era sindica d’Aran, Maria Vergés, manifestaue era sua satisfaccion per aguest nau auanç que “evidéncie dues causes: era importància de compdar damb representacion en govèrn der Estat e eth sòn compromís damb aguesta carretèra e damb era reclamacion istorica deth territòri, que reclame ua via segura e adaptada as besonhs de sostenibilitat actuaus e futurs”.