• Damb ua inversion de 2 milions d’euròs, eth Ministèri de Transpòrts, Mobilitat e Agenda Urbana anoncièc ager qu’a licitat un contracte de servicis entara redaccion deth projècte de condicionament dera N-230 en aguest tram coma via 2+1

• Eth govèrn d’Aran mòstre era sua satisfaccion deuant d’aguest anonci, que se correspon damb eth compromís assomit peth Ministèri damb es territòris afectadi peth pas dera N-230, atau coma manifestèc ara hè un an eth secretari generau d’infraestructures der Estat ena sua visita tath Conselh Generau

Eth Ministèri de Transpòrts, Mobilitat e Agenda Urbana (Mitma) anoncièc ager qu’a licitat un contracte de servicis per impòrt de 2 milions d’euròs entara redaccion deth projècte de traçat e bastiment relacionat damb eth condicionament dera carretèra N-230 coma via 2+1, en sòn tram entre Alfarràs e Benabarre. Eth pressupòst estimat entara execucion des òbres ascendís a 70 milions d’euròs.

“Hè pòc mès d’un an, eth secretari generau d’infraestructures der Estat, Xavier Flores, acompanhat deth secretari generau tath Rèpte Demongrafic, Paco Boya, visitaue era Val d’Aran en ua amassada qu’auec lòc ena sedença deth Conselh Generau d’Aran e a on i èrem presents representants de toti es territòris afectadi peth pas dera N-230, a on se presentèren es projèctes enmarcadi ena Agenda N-230” rebrembaue era sindica d’Aran, Maria Vergés, en tot híger que: “d’alavetz ençà, auem artenhut melhores istoriques tà ua N-230 qu’a demorat desbrembada pendent decades”.

Era licitacion deth tram entre Alfarràs e Benabarre forme part d’aguesta Agenda, en marc dera quau, d’octobre de 2022 ençà, s’a anonciat un contracte de servicis entara redaccion deth projècte de condicionament d’aguesta via damb trams de tres carrils entre Benabarre e Sopeira, s’a licitat eth projècte de melhora deth tram dera boca nòrd deth Tunèl a Vielha, s’a hèt publica era aprobacion der estudi informatiu de condicionament dera via en sòn tram de Sopeira ara boca sud deth Tunèl e a gessut a licitacion eth projècte de condicionament deth tram entre era boca nòrd deth Tunèl e Vielha.