• Era Val d’Aran a estat escuelhuda entre un totau de 154 candidatures, amassa damb 24 destinacions mès, entà desvolopar un Plan de Sostenibilitat Toristica

• Eth Conselh Generau d’Aran a desvolopat pendent er ostiu eth projècte presentat e a trabalhat entara obtencion d’aguesti recorsi que serviràn entà melhorar er entorn naturau deth territòri, era sua mobilitat e era gestion dera destinacion 

Era Val d’Aran ei ua des 25 destinacions de tot er Estat qu’a artenhut ua importanta inversion economica des 58 milions destinadi peth Ministèri entà dar supòrt as destinacions toristiques sostenibles.

“Era Val d’Aran a estat escuelhuda entre 154 candidatures presentades entà desvolopar un Plan de Torisme Sostenible qu’aportarà 2 milions d’euros entà melhorar es nòsti entorns naturaus, en especiau era mobilitat e era gestion deth nòste territòri”, explicaue eth sindic d’Aran, Francés Boya, en tot híger que: “des deth govèrn deth Conselh Generau d’Aran èm plan satisfèti per poder desvolopar aguest Plan de sostenibilitat, pr’amor que refòrce projèctes que ja desvolopam, coma ei eth cas dera candidatura ara Resèrva dera Biosfèra e era creacion d’un observatòri de torisme rurau”.

Aguestes actuacions viraràn ath torn èishi que seguissen: era governacion toristica, era prepausa de valor sostenible, era competitivitat e especializacion e eth marketing e promocion sostenibla.

Atau madeish, laguens d’aguest Plan se desvoloparàn actuacions entà convertir Aran en ua destinacion toristica intelligenta (DTI), e tanben se trabalharà en airaus coma era mobilitat sostenible e eth contròl d’accèssi. S’amiaràn a tèrme melhores ena relacion publico-privada, projèctes de desestacionalizacion e diversificacion dera ofèrta toristica ath temps que se generarà activitat economica sostenible. Ath delà s’amiaran a tèrme accions de refòrç dera identitat, en tot méter valor eth nòste auviatge e patrimòni culturau.