• Aguest convèni permeterà era creacion d’un marc de cooperacion entre es institucions implicades e era creacion de tres Celules d’Innovacion Rurau a trauès des quaus impulsar es actuacions de besonh entà crear ua dinamica territoriau que se fonamente ena collaboracion public-privada, era innovacion e era retencion e atraccion deth talent locau

Aguest meddia, eth secretari generau entath Rèpte Demografic, Francés Boya, era sindica d’Aran, Maria Vergés, eth president dera Deputacion de Lleida, Joan Talarn, e eth president dera Deputacion de Huesca, Miguel Gracia, an amiat a tèrme era signatura deth convèni tath desvolopament deth Projècte d’Innovacion Territoriau e eth Desvolopament de Cellules d’Innovacion Rurau.

Er objectiu d’aguest convèni ei era creacion d’un marc de cooperacion entre es institucions implicades e supausarà era ampliacion, consolidacion e creacion de tres Celules d’Innovacion Rurau: era Celula d’Innovacion Rurau Pirenèu-Aran (que comprenerà territòris pirenencs de Huesca e Lleida, atau coma era Val d’Aran), era Celula d’Innovacion Rurau Tèrres de Lleida e era Celula d’Innovacion Rurau dera provincia de Huesca. Eth marc de cooperacion propiciat peth convèni afavorirà es sinergies entre es tres celules desvolopades.

“Aguest convèni respon ara volontat compartida dera administracion der Estat, es Deputacions provinciaus e eth Conselh Generau de desvolopar un Projècte d’Innovacion Territoriau qu’abòrde era situacion creada coma conseqüéncia des naui e recents procèssi demografics qu’an afectat ara distribucion tradicionau dera poblacion en territòri e dongue responsa as naui rèptes que plantège era desigualtat territoriau generada per aguesti cambis” explicaue eth secretari generau entath Rèpte Demografic que higie: “aguesti procèssi demografics supausen un risc de despoblacion tà un important nombre de zònes ruraus que, ath madeish còp, patissen tanben un envielhiment dera sua poblacion, vedent grèument afectades es sues possibilitats de desvolopament economic e sociau, quauquarren qu’afècte tanben ath benèster e qualitat de vida dera sua ciutadania”.

“Gràcies ad aguest convèni, que dòte ath Conselh Generau d’Aran de 100.000 € a receber en quate ans, poiram impulsar es actuacions de besonh entà crear ua dinamica territoriau que se fonamente ena collaboracion public-privada, era innovacion e era retencion e atraccion deth talent locau” explicaue era sindica d’Aran, Maria Vergés, en tot híger que: “açò mos servirà de base entà generar projèctes transformadors que impulsen un modèl de desvolopament territoriau sostenible e reequilibrador des actuaus deficits demografics, de infraestructures e de servicis que patissen es zònes de monatnha, coma ei eth cas dera Val d’Aran”.

Joan Talarn s’a felicitat pera signatura deth convèni e a destacat que “a partir d’ara se tracte de dessenhar politiques actives tà revertir era constanta deth despoblament e, ath temps, damb era mentalitat qu’aquerò que pogam aplicar enes nòstes comarques servisque de modèl entà d’auti territòris que patissen eth madeish problèma. Des d’Aran, Lhèida e Òsca, en estreta collaboracion, èm disposadi a mostrar eth camin entà retornar era vida enes nòsti pòbles”.

En sòn torn d’intervencion, Miguel Gracia a dit que “auem de besonh revertir ua manca d’inversion que ven de luenh as territòris de montanha e ei basica era collaboracion permanenta que mantenguem damb era Deputacion de Lhèida e eth Conelh Generau d’Aran”.