• Dijaus passat, eth director gerent des Servicis Assistenciaus Integrats d’Aran presentèc en aguest Congrès, que connècte a organizacions de tot eth mon en airau sanitari e sociau, eth modèl integrat dera Val d’Aran, un sistèma unic que permet balhar ua respòsta unitària deuant des besonhs des persones

Eth passat dijaus, 26 d‘octobre, eth director gerent des Servicis Assistenciaus Integats d’Aran, Jordi Vilana, presentèc en 46au Congrès Mondiau d’Espitaus IHF de Lisboa eth nòste modèl integrau. Un acte que compdèc tanben damb era preséncia dera directora deth Servici Aranés de Benèster e Salut (SABS), Maria Àngels Borràs.

Cau rebrembar qu’eth sistèma sanitari e sociau d’Aran ei un sistèma unic que permet balhar ua respòsta unitària deuant des besonhs des persones, un sistèma integrat de benèster e salut que place en centre des accions e politiques as persones.

Era descentralizacion territoriau, funcionau e d’autonomia organizativa ena atencion as persones dera que dispause era Val d’Aran mos balhe oportunitats diferenciaus e uniques entara innovacion, pr’amor que compdam damb ues condicions que mos placen coma entorn ideau entath desvolopament de projèctes pionèrs d’integracion sociau e sanitària, que poguen èster adaptables e extrapolables a d’auti territòris.

Aguest Congrès Internacionau, que se ven celebrant der an 1929 ençà, ei un fòrum globau que connècte a organizacions de tot eth mon en airau dera salut e er ambit sociau entà compartir coneishements e bones practiques, escambiar ideès e establir connexions.