Vielha, 27 de març de 2019.- Tres pèces deth hons deth Musèu dera Val d’Aran an gessut aguest deluns en direccion a Barcelona, damb motiu de dues exposicions temporaus. Se tracte d’ua espada, ua bombarda e ua bala, totes eres deth sègle XV e provenentes deth Castèth de Les. Aguestes pèces intègren era exposicion permanenta deth Musèu e expliquen eth contèxte dera defensa dera termièra en epòca medievau e modèrna.

Es tres pèces deth hons deth musèu anaràn destinades a dues exposicions disparières en dus des musèus mès emblematics de Barcelona. Aguesta circulacion d’òbres permeterà, ath madeish temps, qu’es pèces araneses poguen èster coneishudes e admirades, mès enlà des nòstes termières, en musèus de grana afluéncia de public, e èster divulgades en un contèxte mès internacionau.

Era bombarda de man e ua bala hèta damb pèira d’arriu s’expausaràn ena exposicion temporau “Barcelona, capital meditarrània” en Museu d’Història de Barcelona. Se poderà visitar deth 29 de març ath 29 de seteme de 2019 en ua des sales mès istoriques dera capitala: en salon del Tinell, ena Plaça del Rei de Barcelona.

Parallèlament, era espada deth tipe “gran capitán” passarà a èster part dera exposicion “L’esplendor dels castells medievals catalans”. Dejà inaugurada en Museu d’Arqueologia de Catalunya e gràcies ara sua prolongacion enquiath 2 de junh, integrarà naues òbres coma ei eth cas d’aguesta espada.

Ben lèu, eth Musèu dera Val d’Aran profitarà er espaci liure deth musèu entà expausar òbres deth sòn hons que jamès an vist era lum, en tot relacionar-se damb eth discors museografic. Atau, eth public qu’a visitat anteriorament eth Musèu, poderà tornar a veder-lo damb era possibilitat de descorbir naues pèces e naui coneishements dera nòsta istòria.

Info e fotos: Musèu dera Val d’Aran