• Un recitau poetic entà commemorar eth dia Internacionau dera Poesia, qu’aurà lòc eth pròplèu diuendres 21 de març entàs 18 ores ena Bibliotèca Generau de Vielha.

Aguest eveniment, organizat peth Musèu dera Val d’Aran des de 2013, ei ua des activitats culturaus mès consolidades e participatives laguens dera programacion des Musèus dera Val d’Aran. Era jornada s’a premanit en collaboracion damb es bibliotèques de Vielha e Salardú, er Airau de Lengua deth Conselh Generau d’Aran e er Archiu Generau d’Aran.

Eth hiu conductor dera serada se restacarà damb era tematica deth musèu d’enguan: es viatges. Es participants recitaràn poèmes que guidaràn ath public a trauès d’un itinerari imaginari per divèrses parts del mon. En tot cercar era diuersitat lingüistica, s’enteneràn a parlar enquia dètz lengües diferentes, damb es sues pròpries varietats dialectaus.

Coma cada an, se repartirà ua publicacion damb es poèmes deth recitau, entà seguir era serada e emportar-se un rebrembe. Atau madeish, er espectacle anarà acompanhat d’animacion, musica e teatre.

Eth recitau serà retransmetut en dirècte peth canau de YouTube de Musèus Val d’Aran: @museusderavaldaran . En acabar, eth videò demorarà en aguest canau entà futures visualizacions.

Es assistents e participants poderàn publicar enes hilats damb era etiqueta #andesviatges2025.

Vielha, 19 de març 2025