Eth tecnic deth Conselh Generau d’Aran, Ivan Afonso, eth sindic d’Aran, Carlos Barrera, eth conselhèr d’Agricultura, Ramaderia e Medi Naturau d’Aran, Jose E. Arró e eth baile dera EMD d’Arties e Garòs, David Torres, ena ròda de premsa conjunta.

En ua ròda de premsa conjunta ena qu’an participat eth sindic d’Aran, Carlos Barrera, eth conselhèr d’Agricultura, Ramaderia e Medi Naturau d’Aran, Jose E. Arró, eth baile dera EMD d’Arties e Garòs, David Torres, e eth tecnic deth Conselh Generau d’Aran, Ivan Afonso, s’a explicat era situacion actuau des ossi deth nuclèu zoològic d’Arties.

Eth sindic d’Aran, Carlos Barrera, a manifestat “er an 1996, tot just un an dempús der liurament per part der Estat francés des prumèrs exemplars d’ossi brun enes Pirenèus provenenti d’Eslovènia, er unic pòble deth Pirenèu qu’acceptèc era installacion d’un espaci entà acuélher laguens deth programa de sensibilizacion impulsat pera Generalitat siguec eth pòble d’Arties e eth municipi deth Naut Aran. Donques er arregraïment d’aguesta implicacion ei sense cap de dobte çò qu’en aguesti moments auien d’auer mès qu’arrés es grops animalistes”.

Barrera a hijut “damb era aplicacion dera actuau nòrma sus es parcs zoològics, er Ajuntament deth Naut Aran e eth pòble d’Arties an decidit dar per finalizada era sua implicacion en aguesta sensibilizacion”.

Eth Servici de Biodiversitat dera Generalitat de Catalonha ei pendent d’arrecéber per part dera Associacion animalista es pressupòsti de translocacion des ossi e que se ne darà traslat ath Conselh Generau d’Aran entà veir d’arribar a un acòrd de collaboracion entre administracions (Generalitat/ Conselh Generau/ Ajuntament de Naut Aran).

Eth traslat des ossi ei previst que se pogue hèr aguesta tardor.