Eth pròplèu dimenge, 19 d’abriu, eth Palai de Gèu se somarà ara commemoracion deth Dia Mondiau dera Activitat Fisica, ua campanha qu’impulse era Generalitat de Catalonha per miei dera Secretaria Generau der Espòrt.

Er eslogan d’enguan ei “Sedentarisme = Malautia, Activitat Fisica = Salut” e eth rèpte que s’a fixat eth govèrn catalan vò superar es mès de 200.000 persones que participèren eth 2014.

Era activitat que desvoloparà eth Palai de Gèu consistís en ua activitat fisica en aire liure que transcorrerà per un itinerari d’apuprètz 5 km e includirà sies estacions entà qu’es participaires poguen experimentar exercicis saludables damb materiau d’usatge quotidian. Eth trèt de gessuda ath prumèr grop se preve entàs 10h00 e aurà ua durada aproximada de dues ores. Eth recorregut que seguiràn es participaires d’aguesta pròva recorrerà eth traçat que s’obsèrve en mapa qu’adjunham e aurà coma punt d’amassada e d’arribada era plaça deth Conselh Generau d’Aran.

Pendent eth transcors d’aguesta activitat, era plaça deth Conselh Generau d’Aran tanben acuelherà activitats esportiues de caractèr dirigit entà presentar ua part dera aufèrta d’activitats que s’includissen ena programacion ordinària deth Palai de Gèu.

Eth Dia Mondiau dera Activitat Fisica se comencèc a celebrar eth 6 d’abriu de 2002 en Sâo Paulo (Brasil) e era Organizacion Mondiau dera Salut (OMS) da tot eth sòn supòrt e la qualifique coma essenciau ena lute contra eth sedentarisme. En Vielha, en 2013 se hèc ua activitat similara e, enguan, s’a reprenut damb era collaboracion der Ajuntament de Vielha e Mijaran, eth Conselh Generau d’Aran e era Associacion de Volentaris Val d’Aran.

Mès informacion: ITINERARI DIA DER ESPÒRT