• Eth Plen deth Parlament de Catalunya a aprovat era modificacion d’aguesta Lei impulsada peth Conselh Generau d’Aran en noveme de 2022 a traués d’ua Iniciativa Legislativa que reclamaue que se corregisse era disposicion addicionau entà assegurar juridicament era veïcularitat dera lengua pròpria d’Aran enes escòles deth nòste territòri

• Era sindica d’Aran a compareishut en Plen deth Parlament entà deféner aguesta modificacion

Eth Plen deth Parlament a aprovat aué era modificacion dera disposicion addicionau dera Lei 8/2022 sus er emplec e aprenedissatge des lengües oficiaus en ensenhament non universitari, qu’eliminaue eth caractèr de lengua veïculara der aranés ena escòla, dempús qu’eth Conselh Generau d’Aran presentèsse eth passat mes de noveme ua Iniciativa Legislativa entà modificar aguest tèxte e assegurar juridicaments eth caractèr de lengua veïculara der aranés ena escòla.

Era sindica d’Aran, Maria Vergés, a compareishut en aguest Plen, en tot expausar era fragil situacion dera lengua pròpria d’Aran e expausar qu’era modificacion d’aguesta disposicion addicionau ei de besonh entà protegir ua lengua minorizada que se trape en limit dera perviuença.

Aguesta modificacion a estat aprovada damb es vòts a favor deth PSC, ERC, Junts per Catalunya e en Comú Podem, era abstencion dera CUP, Ciutadans e eth Grop Mixt, e es vòts en contra de VOX.