Era passada dimenjada, se celebrèc ena ciutat comtau eth campionat internacionau de patinatge sus gèu “Copa Barcelona” ena quau participèren cent quinze patinadors, de diferentes categories.

Eth patinador aranés, nauvengut en Barcelona, dempús de participar en stage de parelhes organizadi pera Federacion Internacionau en Berlin, mos comentaue que venie damb fòrça desir de participar ena darrèra competicion dera sason, que se celèbre ena pista de gèu deth Fotbòl Club Barcelona, pista ena quau entrene des de hè dues sasons, damb eth grop de tecnificacion dera Federació Catalana d’Esports d’Hivern.

Ena Copa Barcelona hec concurréncia ena modalitat individuau ena categoria junior ISU, e en parelhes liures damb Mónica Carratalà dera F.C.B.

Aguesta competicion siguec fòrça exigenta pr’amor qu’ère era darrèra dera sason e toti es patinadors vien damb eth cansanci acumulat de tot un an de trabalh e competicions.

Tòn, auie dobla motivacion en aguesta competicion, en tot poder demostrar eth trabalh realizat en stage de Berlin de parelhes, e en tot demorar ena prumèra posicion damb Mónica. Ena competicion individuau hège concurréncia er actuau subcampion d’Espanha, Héctor Alonso, ath que podec guanhar e classificar-se ena prumèra posicion.

Tòn, signèc enguan un convèni damb eth Conselh Generau d’Aran e Foment Torisme Val d’Aran entà promòir era destinacion toristica esportiua Val d’Aran peth mon, representada ena imatge e en es valors deth joen patinador, mejançant eth patrocini institucionau.