Vielha, 31 de mai de 2019.- Eth refugi Lluis Estasen ath pè deth Pedraforca en Parc Naturau Cadí-Moixeró a acuelhut ua naua amassada de trabalh deth Plan de refugis deth projècte ENTREPYR II, que hè part deth Programa de Cooperacion Territoriau Europèa INTERREG VA (Espanha-França-Andòrra) POCTEFA 2014-2020.
Ena reünion an participat es tecnics deth Conselh Generau d’Aran Jòrdi Gavaldà e Manel Monge.
Era jornada de trabalh a servit tà auançar sus es tematiques referents ad aguest Plan de refugis transfronterier en encastres coma era modernizacion des refugis, era començada d’accions de promocion, comunicacion e comercializacion en airau des hilats sociaus, ua pagina web conjunta e eth motor de resèrves, ath delà dera elaboracion de contenguts de vidèo e fotografics des refugis deth Pirenèu.
Pendent era jornada tanben s’auancèc ena creacion der observatòri des refugis, que s’elabòre des dera Universitat de Toulouse damb informacion de sojorns, usatgèrs e servicis a trauès d’enquèstes realizades pendent es quate estacions der an. En aguest sens cau destacar qu’ena Val d’Aran aguest iuèrn e primauera s’a realizat ua prumèra enquèsta en refugi de Saboredo.
Un des objectius principaus deth projècte ei arténher qu’es amants des montanhes recorren indistinta e amassa es refugis espanhòus, francesi e andorrans, e era utilizacion des naues tecnologies enes refugis deth Pirenèu.
A trauès deth projècte ENTREPYR II, damb ua subvencion de 97.500 €, eth Conselh Generau d’Aran installarà es dus refugis de montanha dera Val d’Aran dus banhs shuts e dues potabilizadores entath tractament d’aigües residuaus. A part d’aguestes melhores eth Conselh Generau tanben a previst destinar part d’aguesta subvencion ara melhora dera promocion e comercializacion des rotes de senderisme dera Val d’Aran atau coma era difusion dera madeisha via web.
Eth Conselh Generau d’Aran participe en aguest projècte europèu amassa damb era Federación Aragonesa de Montañismo, era Federació d’Entitats Excursionistes de Catalonha (FEEC) e eth Gobierno de Aragón per part espanhòla, amassa damb eth Parc National des Pyrénées, L’Université de Toulouse III e era Federation Française des Clubs Alpins et de Montagne pera part francesa, e era Federació Andorrana de Muntanyisme coma entitat associada.
POCTEFA ei un programa europèu de cooperación transfronterièra creat entà fomentar eth desvolopament sostenible, atau coma entà refortilhar era integracion economica e sociau deth territòri de Catalonha que limite damb França e Andòrra, a trauès deth finançament de projèctes dessenhadi e geridi per organismes publics e privadi des dus costats des Pirenèus. Eth Programa se finance a trauès deth Hons Europèu de Desvolopament Regionau (FEDER).
Era pròplèu amassada de trabalh deth projècte ENTREPYR II aurà lòc en Saragossa, a on se presentarà era plataforma web que jà serà operativa en mes de seteme.
