Eth Plen ei er organ suprèm de manifestacion dera volentat deth Conselh Generau d’Aran, integrat per 13 conselhèrs (escuelhuts democraticaments enes eleccions municipaus cada quate ans) e presidit peth sindic d’Aran o vicesindic que legauments lo remplace.

Ei competéncia deth Plen es senhalades en article 10 dera Lei 16/1990, de 13 de junhsèga, sus eth Regim Especiau dera Val d’Aran e aqueres que li siguen assignades pes leis sectoriaus.

Es sessions deth Conselh pòden èster ordinàries e extraordinàries, e aguestes darrères, ath viatge, pòden èster urgentes. Es sessions extraordinàries son convocades entà resòlver ahèrs que precisen èster tractats de manèra singulara o, que per rason d’urgéncia, non pòden demorar enquiara celebracion dera session ordinària.

Eth Plen deth Conselh s’amassarà en session plenària ordinària, coma minim, cada dus mesi e en session extraordinària quan atau ac decidisque eth sindic o ac sollicite era quatau part, aumens, deth nombre legau des conselhèrs deth Conselh Generau d’Aran, sense que cap de conselhèr ne pogue sollicitar mès de tres annauments.

Es sessions ordinàries se celebraràn eth darrèr deluns de mes e cada dus mesi, en tot començar en hereuèr e contunhar en abriu, junh, octobre e deseme. Eth mes d’agost se considerarà inabil en tot trasladar-se era celebracion dera session ordinària corresponenta ad aguest mes laguens dera prumèra quinzea deth mes de seteme.

Es ahèrs des resolucions que corresponguen ath Plen seràn elaborats per organ competent o peth conselhèr-delegat.

Es Plens se celebraràn ena Sala de sessions dera sedença oficiau deth Conselh Generau d’Aran, o ben ena Sala de sessions dera Casa deth Senhor d’Arròs abilitada ar efècte, en vertut d’acòrd plenari de 24 de hereuèr de 1999.

Es acòrds des Plens seràn executius un còp acabada era session ena quau siguen adoptats.

Es Plens deth Conselh seràn publics mès en tot poder èster secrets eth debat e era votacion d’aqueri ahèrs que poguen afectar eth dret fondamentau des ciutadans ath quau hè referéncia er article 18.1 dera Constitucion Espanhòla, quan atau ac acòrde eth Plen per majoria absoluta.