Vielha, 19 de deseme de 2017.- Eth plen deth Conselh Generau d’Aran, ena darrèra session der an, votèc en favor dera aprobacion definitiva dera modificacion de crèdit de 2,5 milions d’èuros entara adjudicacion deth projècte entath bastiment dera residéncia de gent grana deth Baish Aran.

Eth sindic d’Aran, Carlos Barrera, expliquèc que se tracte d’incorporar miei milion d’èuros as dus milions iniciaus, pr’amor qu’entà trèir a concors es òbres de bastiment dera naua residéncia deth Baish Aran ei de besonh disposar deth finançament globau dera òbra. Eth sindic d’Aran, hec mencion a qu’era avaloracion des aufèrtes se harà sonque en tot auer en compde era baisha economica, donques non aurà melhores per que eth projècte ei sufisentaments plan redactat.

Per d’auta part, eth plen tanben aprovèc iniciauments eth nau reglament d’emplec entàs productes acuelhudi ath distintiu “Hèt a man hèt aciu – Artesania dera Val d’Aran”, atau coma era composicion dera comission de seguiment e certificacion entara gestion e contraròtle deth madeish.