• En tot auer-se implementat de manèra ja formau eth passat 1 de gèr eth traspàs definitiu dera gestion des emergéncies en Aran, s’a dat compliment ar acòrd prenut en març de 2021 de creacion d’ua taula permanenta de negociacion entre eth Conselh Generau d’Aran e eth collectiu de Pompièrs Emergéncies tath seguiment compartit dera evolucion des resultats de Pompièrs Emergéncies, que permete avalorar eth resultat des exercicis compdables e redusir progressivament eth numerò d’ores, damb eth vòt favorable deth grop d’Unitat d’Aran e eth vòt en contra de Convergéncia Aranesa

Aguest maitin eth Plen dera maxima institucion aranesa a aprovata aprovat, damb es vòts a favor d’UA e en còntra de CA, era creacion dera taula permanenta d’interlocucion entre eth Conselh Generau d’Aran e es representants deth collectiu de Pompièrs-Emergéncies. Aguesta taula a ua vocacion de permanéncia e ei formada per membres deth govèrn, tecnics deth Conselh Generau d’Aran e representants des trabalhadors, atau coma responsables des diuèrsi airaus de Pompièrs Emergéncies.

Ua des qüestions que se tractaràn en aguesta taula, ath delà de totes aqueres relacionades damb era avaloracion des resultats compdables e aqueres questions laboraus derivades deth convèni laborau, ei eth compromís deth govèrn d’Aran de iniciar una dinamica progressiua de disminucion dera jornada annau enquia arribar as 1640 ores, question que ja a començat a aplicar-se pendent aguest passat an.

Atau madeish, un des objectius dera taula ei tanben eth de trabalhar en Plan Director de Pompièrs Emergéncies, que realize eth diagnòstic dera situacion actuau e de projèctes de futur damb era participacion des trabalhadors.

Era sindica d’Aran a manifestat que “damb era creacion formau d’aguesta taula, cream un marc estable de dialòg e negociacion que a coma principau objectiu consolidar eth nòste sistèma d’atencion as emergéncies coma un sistèma de referéncia e d’ua nauta qualitat, autant en çò que hè ath servici ara ciutadania coma ara situacion laborau des trabalhadors e des Pompièrs Voluntaris”.