Vielha, 19 de seteme de 2017.- Eth Plen deth Conselh Generau d’Aran a aprovat per unanimitat era creacion deth Conselh de bailes dera Val d’Aran, cossent damb es precèptes dera Lei 1/2015 de Regim especiau dera Val d’Aran. Eth sindic d’Aran, Carlos Barrera, expliquèc qu’aguest mandat dera Lei d’Aran substituís ath Conselh de Terçons e incorpòre es bailes e pedanis damb plen dreit en aguest organ consultatiu. Era prepausa dera equipa de Govèrn d’Aran, ère qu’es reünions auessen ua frequéncia bimensuau, aguesta prepausa iniciau, a estat modificada a peticion des pòrtavotzes des grops dera oposicion, qu’an prepausat qu’es reünions agen ua frequéncia de 6 mesi e qu’eth sindic d’Aran age era potestat de convocar eth Conselh de bailes, cada viatge que sigue de besonh.

Pendent eth Plen deth Conselh tanben s’a parlat dera ampliacion de places de residéncia geriatrica entara futura residéncia de gent grana de Les. En aguest sens eth sindic d’Aran, Carlos Barrera, a manifestat qu’eth Govèrn d’Aran, a amiat a tèrme un estudi sus er envielhiment dera poblacion ena Val d’Aran e d’auta sus es listes de demora de demanar d’aguesti servicis, que justifiquen eth besonh d’aguest nau equipament ena Val d’Aran. Barrera, expliquèc qu’en aguest moment ja se redigís eth projècte executiu d’òbra que serà prèst en noveme. Un còp trèt a concors era licitacion d’òbres e en tot començar eth bastiment, se licitarà era prestacion deth servici condicionat ar acòrd entre eth Conselh Generau d’Aran e eth departament de Benèster dera Generalitat, que consistís en finançament de 30 des 60 places dera futura residéncia (30 places consorciades e 30 places privades), e des 20 places de residéncia de dia, 10 d’aguestes an d’èster publiques e 10 privades. Barrera a explicat qu’era planificacion entà començar aguesta residéncia geriatrica de Les ei qu’er an 2018 se dedique ath bastiment der equipament e qu’aguesta entre en foncionament eth 1 de gèr der an 2019.

En aguest Plen, es grops dera oposicion an demanat ath sindic d’Aran, Carlos Barrera, s’eth Conselh Generau d’Aran, cedirà bèth espaci entath referendum der 1 d’octobre.

Eth sindic d’Aran, a explicat qu’eth Conselh Generau d’Aran, non cedirà cap espaci laguens dera sedença institucionau dera Casa deth Senhor d’Arrós, ne ena sedença administrativa deth Conselh Generau en Vielha, damb er objectiu de preservar es sedences institucionaus deuant dera polemica des plantejaments antagonics que se produsissen en aguestes darrères setmanes en Aran.

Eth sindic d’Aran, a ahijut qu’eth Conselh Generau d’Aran coma govèrn territoriau deth país, a de respectar totes es sensibilitats qu’en aguesti moments aflòren, e mostrar era sua imparcialitat deuant aguesta realitat sociau.

Barrera, a soslinhat qu’enes pròplèus dies, e en tot observar es eveniments e coma se produsisquen se sajarà d’arribar a ua decision acordada per consens.