Vielha, 28 de hereuèr de 2018.- Eth Plen deth Conselh Generau d’Aran a aprovat per unanimitat de toti es grops representadi CDA, UA-PSC e PRAG, ua mocion conjunta en favor der impuls e proteccion der aranés coma lengua pròpria d’Aran. Era aprobacion dera mocion ei motivada pera senténcia deth TC qu’anulle er emplec preferent der aranés recuelhut ena Lei 35/2010 der 1 d’octobre der Occitan, Aranés en Aran, que siguec recorruda peth Conselh de Ministres deth Govèrn d’Espanha de data 22 de junhsèga de 2011. Ua senténcia qu’arribe 7 ans dempús.

Era mocion aprovada aué, contemple ua seria de mesures coma son era d’incrementar era aportacion economica dera Generalitat, en compliment dera Lei 1/2015 de regim especiau d’Aran aprovada peth Parlament de Catalonha, entà dotar ath Conselh Generau d’Aran des mieis economics de besonh entà implementar totes aqueres accions qu’incrementen er emplec sociau dera lengua aranesa e hèr-la mès presenta e mès viua, non solaments ena Val d’Aran mès tanben dehòra deth territòri.

Era mocion tanben contemple era creacion d’ua comission der aranés designada peth Plen deth Conselh Generau d’Aran, aguesta comission s’integrarà laguens dera ja existenta d’ahèrs institucionaus, e possiblaments requeirà sus es madeishi conselhèrs.

Eth sindic d’Aran, Carlos Barrera, expliquèc qu’eth Conselh Generau d’Aran harà arribar es acòrds dera mocion entàs ajuntaments dera Val d’Aran, eth Govèrn dera Generalitat e ara Deputacion de Lhèida, e que prepausarà as ajuntaments aranesi que s’aderisquen ad aguest plan d’impuls der aranés.

Pendent eth Plen eth sindic a explicat qu’a enviat ua carta personau ath ministre d’Educacion e Cultura, Iñigo Méndez de Vigo, eth contengut que ne siguec aprovat pes membres deth Conselh de Govèrn, entà demanar-li respècte pera lengua aranesa e entà que demane desculpes ara poblacion aranesa dempús des sues desgraciades e simplistes paraules sus er aranés en ua responsa en Senat. Paraules que non son pròpries d’un ministre deth govèrn der Estat.

Eth Plen deth Conselh d’aué, tanben a aprovat iniciauments era ordenança reguladora dera administracion electronica deth Conselh Generau d’Aran, qu’eth vicesindic d’Aran, Luís Carlos Medina, n’expliquèc qu’ei previst que sigue totauments implementada er an 2020.