Era ordenança contemple sancions que van de 100 a 300 € entàs sancions considerades leugères, de 300 a 3.000 € entàs grèus, e de 3.000 a 6.000 € entàs considerades fòrça grèus

Arròs, 17 de deseme de 2018.- Eth plen deth Conselh Generau d’Aran en session ordinària celebrada ena Casa deth Senhor d’Arròs, a aprovat per unanimitat era modificacion dera Ordenança Reguladora dera Gestion de Residus Urbans dera Val d’Aran.

Eth sindic d’Aran, Carlos Barrera, expliquèc qu’era Ordenança Reguladora contemple drets e déuers, entre eri es des ciutadans, que pòden hèr suggeriments sus com melhorar eth servici atau coma era implicacion dera ciutadania en foncionament deth madeish. Eth sindic d’Aran a hèt referéncia ara dificultat enes darrèri ans deth foncionament deth servici, sustot en iuèrn, pes manques de recorsi dera enterpresa concesionaria mès tanben peth mau emplec que hèn quauqui usatgèrs qu’afècten ara eficacia e ara qualitat d’aguest servici, per çò qu’eth plen deth Conselh Generau a aprovat era Ordenança que simplifique era anteriora e que coma totes es ordenances contemple er aspècte sancionador entà toti aqueri que non l’acomplissen.

En aguest sentit, eth sindic d’Aran, Carlos Barrera, expliquèc qu’era ordenança contemple sancions que van de 100 a 300 € entàs sancions considerades leugères, de 300 a 3.000 € entàs grèus, e de 3.000 a 6.000 € entàs considerades fòrça grèus. S’era sancion s’abone es 15 dies abils següents ara imposicion compdarà damb ua bonificación deth 50% dera madeisha.

Carlos Barrera, expliquèc qu’aguest ei un prumèr pas donques que se considère qu’a aguestes nautades eth mau emplec que se hè des isles e des contienedors non a cap justificacion e per açò cau incidir en aguest aspècte. Eth sindic d’Aran a arrebrembat qu’era enterpresa concesionaria a demanat ath Conselh Generau d’Aran que se reconsidere eth còst d’aguest servici en tot auer en compde que s’a melhorat fòrça era recuelhuda des 5 fraccions tractades (envasi, papèr e carton, veire, rèsta e organic) e que semble evident qu’ei de besonh ua equipa mès entà realizar efectivaments eth servici de recuelhuda. Barrera manifestèc qu’es ajuntaments dera Val de Aran auràn d’implicar-se fòrça mès entà hèr possible que non age veïculs qu’empedisquen as camions de recuelhuda de residus accedir enes isles de contienedors entà realizar eth servici.

Eth sindic d’Aran a anonciat qu’eth pròplèu dia 20 de deseme se celebrarà un Conselh de Bailes que se demanarà as responsables municipaus qu’es agents e vigilants municipaus dediquen ua part dera sua jornada ath contròtle sustot de depausa de materiau voluminos enes isles de contienedors entà detectar as persones que non acomplissen era ordenança e que hèsquen arribar es actes ath Conselh Generau d’Aran entà que pogue iniciar es expedients sancionadors corresponents.

Fin finau, eth sindic d’Aran, a explicat qu’en madeish Conselh de Bailes, tanben se demanarà que toti aqueri ajuntaments qu’encara non an adaptat er escut deth sòn municipi ath reglament des escuts des entitats municipaus dera Val de Aran qu’ac hèsquen entà que eth plen deth Conselh Generau d’Aran pogue aprovar-les e desplegar damb plenitud es simbèus dera Val d’Aran.