• A instància deth sindic d’Aran, dus representants der escolanat der Institut d’Aran an presentat aué en Plen ordinari deth Conselh Generau d’Aran era sua demana de poder realizar es Pròves d’Accès ara Universitat (PAU) ena Val d’Aran e non auer de desplaçar-se enquia Lhèida pr’amor des dificultats e eth greuge comparatiu damb d’auti endrets qu’açò compòrte

Eth Plen deth Conselh Generau d’Aran a aprovat aué era mocion deth govèrn deth Conselh Generau d’Aran que demane qu’es Pròves d’Accès ara Universitat (PAU) se realizen ena Val d’Aran. Aguesta mocion, iniciativa des pròpris escolans, a estat presentada ena session plenària a instància deth sindic d’Aran, Francés Boya.

“Aué, per prumèr còp ena istòria d’aguesta institucion, eth plen s’a daurit ara ciutadania entà escotar es sues demanes”, a explicat eth sindic d’Aran, qu’a hijut que: “ua institucion petita coma era nòsta a d’èster propèra ara gent e aguesta iniciativa qu’auem recebut aué dera nòsta joenessa, volem qu’inicie ua etapa a on poscam tractar d’auti ahèrs d’interés generau que propòse era ciutadania”

Entre es motius expausats pes estudiants entà presentar aguesta demana cònsten era distància de lèu 200 km d’anada e d’auti 200 de tornada per ua carretèra de montanha, çò qu’implique 6 ores de viatge, ath delà des despenes per alumne qu’ascendissen a lèu 150 euròs pendent es tres dies que duren es pròves, ua quantitat ara que s’i a de híger eth còst des madeishes pròves, qu’ei ath torn des 120 euròs.

Es estudiants considèren tanben que “i a un grèuge comparatiu damb es alumnes de Lleida o de La Seu d’Urgell e pòbles propèrs, que òc que pòden realizar es pròves en sòn territòri sense besonh de desplaçar-se”. En aguest sens, expausen que serie ua bona iniciativa non sonque entàs alumnes der Institut d’Aran, senon tanben des comarques propères que se trapen ena madeisha situacion, coma era Alta Ribagorça, Pallars Sobirà e Pallars Jussà, que poderien tanben amendrir es despenes e distàncies.

En cas de non èster possible realizar aguestes PAU en territòri enguan, eth Conselh Generau d’Aran s’a comprometut damb es estudiants a estudiar era possibilitat de dar un supòrt economic ad aqueri escolans qu’accedisquen as pròves.

Eth sindic a manifestat qu’eth govèrn aranés “a de préner responsabilitats en aguesta matèria tot e non auer-ne es competéncies pr’amor qu’afècte a ua grana part dera nòsta societat” e ve “fòrça factible er hèt de qu’aguestes pròves poguen realizar-se en nòste territòri e atau ac vam a deféner deuant des administracions competents”.

Aguesta declaracion institucionau deth govèrn d’Aran se harà arribar ath conselhèr d’Ensenhament dera Generalitat de Catalunya, e ara Delegacion Territoriau d’Ensenhament de Lleida.