Eth Plen tanben a aprovat iniciauments eth plan pilòt entara regulacion der accès motorizat ara Ribèra deth Joeu, que se realizarà aguest ostiu

En contorn sociau destaque era aprobacion dera atribucion des competéncies ath Servici Aranés de Benéster e Salut, entara avaloracion e resolucion des expedients de discapacitacion e dependéncia

Vielha, 25 d’abriu de 2016.- Eth Plen deth Conselh Generau d’Aran en session ordinària celebrada ena Casa deth Senhor d’Arròs, a aprovat definitiuaments damb es vòts en favor deth Govèrn d’Aran, de CDA e es vòts en contra dera oposicion, UA-PSC e PRAG, era modificacion en regim de gestion deth servici d’emergéncies, prevencion e escandiment de huecs, rescats de montanha e proteccion civila.

Atau donques eth servici d’emergéncies ena Val d’Aran, se regirà lèu a trauès d’ua Societat de Responsabilitat Limitada de capitau integralaments public. Era oposicion defenie que se hesse, coma auie ja defenut er anterior Govèrn hè ans, a trauès d’ua EPA (Emergéncies Pompièrs d’Aran), regida practicaments de forma assembladaria. Eth modèl aprovat aué de Societat de Responsabilitat Limitada de capitau public, definirà era participacion enes procèssi que se determinen a trauès deth reglament que se redigirà entath foncionament dera Societat Pompièrs Emrgències SL. Eth sindic d’Aran, Carlos Barrera, a soslinhat que “aguesta diferéncia, ei era quau a provocat era crispacion dera oposicion”. E a ahijut qu’“ei un posicionament pròpri de ego personau e de frustracion deth cap dera oposicion, Frances Boya”. Barrera, tanben a explicat que “aguesta possibilitat d’auançar damb un modèl pròpri dera Val d’Aran, sonque se podie sométer damb era empara dera naua Lei d’Aran, donques çò que s’auie prepausat damb anterioritat per part d’UA e de PRAG, non ère legauments possible”.

Eth Plen tanben a aprovat damb es vòts en favor deth Govèrn d’Aran de CDA e era abstencion des grops dera oposicion, era pròva pilòt entara regulacion der accès motorizat ena Ribèra deth Joeu. Aguesta pròva pilòt, que segontes a explicat eth sindic d’Aran, Carlos Barrera, anèc amplaments explicada pendent es darrèri mesi, en ajuntament de Vielha e Mijaran e d’Es Bòrdes, e as EMD de Vilac e Aubert, aurà ua durada de dus mesi e miei, de junh a agost, e comportarà qu’es darrèri 3 km dera pista dera Artiga de Lin, siguen reguladi. Es veïculs que non dispòsen d’autorizacion d’accès motorizat, auràn d’estacionar en parcatge dera ermita. Er orari de regulacion serà de 9 deth maitin a 18 ores. Es taxis deth país, auràn liure accès ena Artiga de Lin, atau coma eth rèste de vesins e vesies dera Val d’Aran, que paguen er impòst de circulacion des sòns veïculs enes ajuntaments dera Val d’Aran. En aguesta pròva pilòt, s’abilitarà un tren, damb servici permanent entàs persones qu’ac volguen usar. Eth prètz deth servici, serà de 2 èuros per viatge en cas des adults, e d’un èuro entà mainatges d’edats comprenudes entre es 3 as 12 ans. Es conclusions que s’extrèiguen d’aguesta pròva pilòt, serviràn as decisions a préner en un futur.

En contorn sociau, cap destacar, era aprobacion per unanimitat deth Plen deth Conselh Generau d’Aran, dera atribucion de competéncies ath Servici Aranés de Benéster e Salut (SABS), entara avaloracion e era resolucion des expedients de discapacitacion e de dependéncia.

Ena session deth Plen, tanben s’a aprovat ua mocion en contra der Acòrd entre era UE e Turquia, sobre era crisi de refugiats.