• Aguesta modificacion respon ath compliment dera Lei 7/2022, de Residus e Sòus Contaminats entà ua Economia Circulara, que mandate qu’es còsti dera gestion des residus an d’èster sufragadi per toti es generadors de residus a trauès d’ua taxa justa, e que s’a d’aplicar en un plaç maxim de tres ans d’ençà dera sua aprobacion en 2022.

• Eth nau modèl de recuelhuda de lordèra pòrta a pòrta en Aran, que contemple tanben accions d’informacion, conscienciacion e assessorament tara ciutadania, entrarà en foncionament enes propères setmanes en tot iniciar-se damb grani productors.

• Eth còst d’implementacion d’aguest nau modèl de remassada pòrta a pòrta, que per un aute costat resulte indispensable entà complir damb era normativa e damb es estandars de qualitat e sostenibilitat ambientau, ei mès naut qu’er anterior, çò que supause, iniciauments, un aument dera taxa qu’actuaument se pague.

Aguest maitin, eth plen deth Conselh Generau d’Aran a aprovat era modificacion dera ordenança fiscau reguladora dera taxa de residus. Aguesta modificacion ven obligada peth compliment dera Lei 7/2022 de Residus e Sòus Contaminats entà ua Economia Circulara, que daurís un nau paradigma per çò que hè ara gestion des residus a nivèu generau, tanben en Aran, e que mandate qu’eth còst de gestion dera lordèra a d’èster sufragat pes productors de residus e, per tant, a de demorar reflectit ena taxa.

Era ordenança aprovada establís dues tarifes especifiques, ua fixa e ua variabla, destinades ara remassada de  residus domestics o assimilables e comerciaus, qu’en cap cas superarà eth còst reau o previsible deth servici qu’includissen era remassada, eth transpòrt e eth sòn tractament. D’aguestes dues tarifes, que se crubaràn en dus periòdes diferents, se poderà veir redusida era que correspon ara part variabla, tostemp que s’amien a tèrme bones practiques en çò que hè ath reciclatge e ath compliment dera normativa qu’era remassada selectiva e pòrta a pòrta contemplen.

Eth vicesindic dusau e conselhèr de Gestion Ambientau, Oriol Sala, manifestaue que “era volontat deth govèrn d’Aran ei era d’incentivar eth reciclatge e es bones practiques que permeteràn tanben ua reduccion en recebut dera lordèra” e higie que “mos trobam deuant d’un cambi de paradigma e ei de besonh qu’era Val d’Aran se mete ath dia en çò que hè ara gestion des residus e deishem d’èster ena coa des territòris de Catalunya per çò que hè ath reciclatge”.

Eth nau modèl de remassada de residus qu’eth Conselh Generau d’Aran a impulsat, se començarà a implementar enes pròplèu setmanes e ven tanben mercat pera normativa Europèa, que determine qu’en 2030 calerà auer artenhut un 55% de reciclatge des residus que produsim (en Aran aguesta quantitat actuauments ei deth 24%). Aguesta implementacion s’amiarà a tèrme per fases, en tot començar peth pòrta a pòrta a grani productors (comèrci, restaurants, hotèls, empreses…), e s’estenerà, un viatge consolidada aguesta fasa, as airaus domestics.

En aguest sens, eth vicesindic dusau, Oriol Sala, declaraue que “venguem d’un modèl de gestion de residus totauments obsolet que ja non daue respòsta as besonhs deth territòri” en tot remercar que “eth govèrn d’Aran a trabalhat pendent mès de dus ans entà arténher era implementacion d’un modèl de remassada adaptat, non sonque as besonhs, se non tanben as critèris de sostenibilitat ambientau que son indispensables entath nòste territòri”.

Eth govèrn d’Aran trabalhe tanben en ua campanha informativa tara ciutadania entà presentar eth nau modèl e balhar tota era informacion ath respècte deth sòn desplegament, ath madeish temps que se vò conscienciar dera importància e deth besonh d’implementar aguest nau sistèma.

Era sindica d’Aran, Maria Vergés, a declarat que “èm consicents qu’ua pujada deth rebut non ei agradiua, mès ei important saber qu’actuaments ei era unica via entà, per un costat, complir damb era lei, e per aute, transitar de cap a un modèl de referéncia, que sigue sostenible e que mos permete tanben posicionar era Val d’Aran coma un territòri que hè ben es causes”.

Era taxa aprobada aué entrarà en vigor en 2025 e, damb era implementacion deth nau modèl, permeterà compdar damb dades fiables des quantitats de residus que se genèren, çò que tanben harà possible poder anar ajustant era pròpria taxa en moment qu’es donades de reciclatge melhoren enquias que requerís era Union Europèa tà 2030.

Era ordenança se poderà consultar ena web: www.conselharan.org. Eth plaç de presentacion d’allegacions demorarà dubèrt enquia 30 dies obrants dempús dera publicacion dera ordenança.