Eth Conselh Generau d’Aran en session extraordinària de 18 de gèr de 2016, a aprovat eth padron de cobrament dera taxa deth servici de recuelhuda de lordères e eth sòn tractament entad an 2016 ena Val d’Aran.

Er impòrt deth padron de recuelhuda e tractament de lordères corresponentes ar an 2016, supause un totau de 1.437.213, 88 € que compòrte un increment de € 21.457,98 € respècte deth padron der an 2015. Er increment mès notable, de 34,88%, correspon ath municipi de Bausen motivat pera metuda ath dia deth padron, donques que s’a agut en compde era actualizacion deth madeish en çò que tanh ath nombre de naues residéncies. En totau era aumentacion deth padron de recuelhuda e tractament de lordères ena Val d’Aran entà 2016, represente 1,52%.

Per d’auta part eth Plen deth Conselh Generau d’Aran, tanben a aprovat era Declaracion d’Andorra La Vella des Comunitats de Halhes des Pirenèus, damb motiu dera celebracion dera inscripcion de “Es Hèstes deth huec deth solstici d’ostiu des Pirenèus” ena lista representativa deth Patrimòni Culturau Immateriau dera Umanitat dera UNESCO, damb er objectiu de coesionar e coordinar es accions damb eth rèste de comunitats des 63 pòbles de França, Catalonha, Aragon e Andòrra restacadi en aguestes celebracions e ath madeish temps , mantier e potenciar era identitat e eth valor culturau e patrimoniau unic des hèstes deth Haro e deth Taro de Les e Arties ena Val d’Aran.