Vielha, 27 de hereuèr de 2017.- Pendent era session ordinària deth Plen deth Conselh Generau d’Aran celebrada aué ena Casa deth Senhor en Arròs, s’a acordat era aprobacion definitiva per unanimitat deth plen, deth padron de crubament dera taxa deth servici de remassada de lordères e deth sòn tractament, entad exercici 2017, per un impòrt de 1.474.915€, çò que supause un increment de 2,40% çò que tanh ar an anterior.

Pendent eth Plen deth Conselh Generau d’Aran, tanben s’a encuedat dera situacion sus es negociacions deth Govèrn d’Aran e era Fondacion Pere Tarrés referent ath contracte d’arrendament dera gestion e explotacion dera Aubèrja Era Garona de Salardú per part dera fondacion.

Ad aguest ahèr eth sindic d’Aran, Carlos Barrera, a explicat qu’es responsables dera Fondacion Pere Tarrés an comunicat ath Govèrn d’Aran, era sua volontat de non renonciar, mès de prorogar era signatura deth contracte d’inici dera activitat ara demora qu’eth Conselh Generau d’Aran dispòse de toti es documents administratius de besonh entà poder iniciar dita activitat de gestion e explotacion dera aubèrja Era Garona.

Pendent eth Plen d’aguest deluns, tanben s’a tractat sus eth besonh de melhorar era situacion dera carretèra C-28 e es accèssi en Baqueira Beret. Eth sindic d’Aran Carlos Barrera, a explicat que ja se trabalhe amassa damb es responsables deth departament de Territòri dera Generalitat entà trobar era melhor solucion ad aguesta situacion.