Eth Plen tanben apròve ua mocion conjunta sus era situacion der os ena Val d’Aran
Arròs, 4 de juriòl de 2017.- Eth Plen deth Conselh Generau d’Aran amassat ena Casa deth Senhor d’Arròs, a aprovat damb es vòts a favor de CDA-PNA e era abstencion d’UA-PSC e PRAG es pressupòsti generaus entad an 2017.
Eth pressupòst deth Conselh Generau ascendís a 27.655.333,15 € e represente un increment deth 2% respècte ath der an anterior. En aguest pressupòst non ei recuelhuda era partida de 500.000 € deth Departament de Salut entà completar es òbres der Espitau dera Val d’Aran, que representarie un increment totau deth 4%.
Eth Govèrn d’Aran destine 54% deth pressupòst as àmbits dera Salut e deth Benéster sociau.
Entad aguest exercici 2017 eth Conselh Generau d’Aran torne a priorizar es despenses enes airaus de salut e benéster, en tot preveir entad aguest 2017 era finalizacion des òbres d’ampliacion der airau quirurgic der Espitau dera Val d’Aran e era adaptacion des locaus colindants en Espitau coma burèus d’administracion.
Atau madeish, en àmbit de salut, se preve era contunhitat deth programa de càncer de còlon e era implantacion d’un nau sistèma d’informacion de gestion assistenciau, programes realizadi gràcies ara collaboracion damb era Deputacion de Lhèida.
En çò que tanh ar airau de benéster, eth pressupòst 2017 preve era partida de besonh entara execucion deth projècte executiu e direccion d’òbra dera naua residéncia geriatrica qu’eth Conselh Generau d’Aran preve bastir en pòble de Les.
Aute àmbit que se priorize ei era despensa en organisme Foment Torisme Val d’Aran, damb er increment deth 5% deth sòn pressupòst enquia arribar a 635.080,00 €.
En aguest sens, tanben ei prevista era inversion d’uns 140.000 € entath bastiment deth Centre d’Interpretacion dera Artiga de Lin, un projècte que se complète damb era consolidacion deth “Tren toristic dera Artiga” que s’inicièc coma projècte pilòt en 2016.
En àmbit de camins e sendèrs, eth pressupòst deth Conselh Generau d’Aran torne a destinar mès de 400.000 € entara neteja e mantenença de camins e sendèrs e d’accèssi a nuclèus urbans, a on invertiràn d’auti 168.000 €, damb un totau de mès de 568.000 €.
Cap destacar tanben en àmbit dera cultura e der auviatge, era edicion de libres de tèxte en aranés per impòrt de 30.000 €, era edicion de libres culturaus damb 30.000 € e era inversion en auviatge damb 105.000 € entara melhora de diuèrses glèises dera Val d’Aran.
Eth sindic d’Aran, Carlos Barrera, a soslinhat qu’aguesti pressupòsti entad an 2017 dan responsa ara politica de traspassi artenhuda peth Conselh Generau d’Aran damb era Generalitat de Catalonha e qu’ara sonque demore començar entà acordar eth nau modèl de finançament entà Aran, qu’a d’entrar en vigor en 2018, tau coma preve era Lei de regim especiau dera Val d’Aran.
Mocion sus era situacion der os ena Val d’Aran
En d’aute orde de causes, eth Plen deth Conselh Generau, a aprovat per unanimitat ua mocion conjunta de toti es grops politics en çò que tanh ara preocupacion dera preséncia der os ena Val d’Aran.
Eth sindic d’Aran, Carlos Barrera, expliquèc qu’aguesta mocion contemple basicaments tres àmbits. Eth prumèr de replantejament dera ramaderia extensiva de nauta montanha damb era demanda dera definicion der espaci ossi, e damb mesures d’acompanhament e de supòrt especific, pr’amor que cau dar un pas mès en aguest sens, a dit.
Per d’auta part, eth sindic a explicat que demanaràn ara Generalitat de Catalonha qu’arrespone ar estudi que hè mesi se demanèc des deth Govèrn d’Aran entà definir quin ei eth tet que pòt suportar eth territòri qu’ara aucupe er os e de qué pòt passar se contunhe era proliferacion coma enquia ara des ossi enes pròplèus ans. E a ahijut que tant eth Govèrn dera Generalitat coma eth Govèrn d’Aran, an de remetre en question mesures de reaccion immediata deuant es comportaments aversius de determinadi exemplars, pr’amor que cau préner consciéncia e reaccionar entà dar credibilitat en programa de reintroduccion der os en Pirenèu de 1995, mès entà dar tanben responsa ath sector pagés e ath rèste dera poblacion en tot mostrar qu’es administracions son capaces d’adoptar mesures entà solucionar aguesti problèmes.
Fin finala, eth Plen a aprovat ua mocion sus era futura Lei electorau catalana, entà qué aguesta contemple eth tractament diferenciau dera Val d’Aran, arreconeishut ena Lei 1/2015 de regim especiau d’Aran.
