A trauès d’ua prepausa deth sindic d’Aran Carlos Barrera, eth plen deth Conselh Generau d’Aran, a acordat ena darrèra session der an, impulsar era creacion d’un circuit damb projeccion internacionau entà potenciar eth conjunt de toti es territòris a on se celèbren es hèstes deth huec deth solstici d’ostiu des Pirenèus, recentaments declarat Patrimòni Culturau Inmateriau dera Umanitat dera UNESCO, entà dar un supòrt especiau ara promocion especifica des hèstes deth Haro e eth Taro que se celèbren en Les e Arties. Ena prepausa, a destacat Barrera “li cau èster utila entà potenciar e méter en valor aguesta realitat culturau e patrimoniau dera Val d’Aran”. Era intencion deth Conselh Generau d’Aran, ei coordinar aguestes accions damb eth rèste des representants des comunitats des representants deth Pirenèu qu’includissen 63 pòbles d’Andòrra, França e Espanha.

Ja hè mès de dus ans es responsables der Airau de Cultura e Auviatge deth Conselh Generau d’Aran elaborèren un estudi entà que aguestes hèstes catalogades coma hèstes patrimoniaus dera Val d’Aran, anèssen declarades coma BCIL (Plan Culturau d’interès Locau) e BCIN (Plan Culturau d’Interès Nacionau), laguens era documentacion prealabla ara declaracion dera UNESCO.

Eth Plen deth Conselh Generau d’Aran, a aprovat tanben per unanimitat, ua mocion entà commemorar eth dia internacionau contra era violéncia de genre.

Entà acabar, en çò que tanh ara avaloracion des aspèctes mès destacadi der an 2015, eth sindic d’Aran Carlos Barrera, destaquèc era entrada en vigor dera naua Lei de regim especiau dera Val d’Aran aprovada per majoritat absoluda en Parlament de Catalonha, que da responsa as besonhs d’autogovèrn dera Val d’Aran e auance ena melhora deth finançament deth Conselh Generau d’Aran.