Ena session extraordinària toti es grops que configuren eth Plen deth Conselh Generau d’Aran (Convergéncia Democratica Aranesa – Partit Nacionalista Aranès, Unitat d’Aran-Progrés Municipal-Partit dels Socialistes de Catalunya e eth Partit Renovador d’Arties e Garòs) an votat a favor dera mocion

Eth Plen deth Conselh Generau d’Aran celebrat aué en session extraordinària a acordat per unanimitat era Mocion de supòrt ath pòble de Catalonha entara celebracion dera consulta sus eth sòn futur politic.

En paraules deth sindic d’Aran, Carlos Barrera, “damb aguesta mocion, volem ratificar çò que dejà s’aprovèc unanimament per CDA-PNA, UA-PM-PSC e PRAG, en Plen deth Conselh Generau d’Aran deth 29 d’octobre deth 2012, en tot arreconéisher tanben eth dret a decidir deth pòble aranés”.

D’aute biais, en aguest madeish Plen s’a aprovat e tanben per unanimitat eth requeriment de documentacion ar adjudicatari deth contracte mixt de gestion integrau dera remassada e evacuacion de residus dera Val d’Aran, mejançant procediment dubèrt, damb tramitacion ordinària.

Era contratacion se harà en favor dera empresa JOSÉ ANTONIO ROMERO POLO SAU, dat qu’era sua ei era aufèrta presentada economicament a estat era mès avantatjosa entara administracion e, a mès, complís damb totes es formalitats exigides en Plec de Clausules aprovat eth 24 de hereuèr de 2014.

“Demoram poder implantar eth nau servici de remassada e evacuacion de residus dera Val d’Aran çò mès lèu possible e poder dar un bon servici as nòsti ciutadans” a soslinhat Carlos Barrera, sindic d’Aran.